Mércores 17 Xullo 2024

O CSIC comeza en Vigo unha campaña para estudar a pescada nas costas galegas

O buque Sarmiento de Gamboa, do CSIC, partirá este sábado do porto de Vigo para realizar unha campaña de investigación sobre o recrutamento (o momento no que os exemplares adquiren un tamaño suficiente para que a mortalidade natural baixe e se incorporen á pescaría, habitualmente a partir do primeiro ano de vida) da pescada europea na plataforma continental das costas galegas. Durante 15 días, e como parte do proxecto Dreamer, 18 científicos e técnicos do CSIC percorrerán a costa entre Fisterra e Ribadeo para avaliar a situación da especie nesta zona.

O obxectivo é realizar un estudo integrado do recrutamento da pescada europea do Noreste Atlántico. Segundo explican desde o CSIC, “a pescada europea está fortemente explotada polas pescarías de varios países europeos, polo que na última década a Unión Europea desenvolveu plans de recuperación, dando como resultado a recuperación da biomasa reprodutora”. Porén, este recrutamento sigue sendo variable e no caso do sur do Atlántico, segue decrecendo. Por este motivo, “é fundamental entender e predicir a dinámica reprodutiva dos stocks norte e sur, pois isto determina a capacidade do stock para manter ou aumentar o seu tamaño”, explican os científicos.

Publicidade

Pretenden mellorar o recrutamento da especie no sur do seu hábitat

Ata o de agora, as investigacións centráronse en comprender a ecoloxía reprodutiva da pescada e os factores que afectan á supervivencia das larvas ata chegar á idade de recrutamento. Isto permitiu demostrar a falta de proporcionalidade entre o potencial reprodutivo do stock e a biomasa do stock reprodutor. Tamén se observou a importancia dun stock reprodutor baseado en femias de gran tamaño, cunha produción moi vinculada aos procesos de maduración, e describiuse un patrón de posta complexo, moi prolongado no stock sur, con dous picos de posta, un a finais de inverno e outro en verán.

“A sospeita de que existan dous compoñentes de posta temporais, ben diferenciados e illados, crea moitos interrogantes na contribución de cada compoñente á poboación final de recrutas. É unha característica que debe ser investigada xunto co grado de conectividade entre as dúas poboacións atlánticas”, explicao científico Fran Saborido.

Publicidade

“Imos profundizar nas catro dinámicas da especie: reprodutiva, ambiental, larvaria e de recrutas”, sinalan os investigadores. Para abordar este obxectivo, incorporarase información da poboación máis setentrional (Noruega) e meridional (Portugal). Para isto, contan coa colaboración de centros de investigación de Bergen, no país noruegués, e o Instituto Portugués do Mar e da Atmosfera.

A campaña forma parte do proxecto Dreamer, financiado polo Plan Estatal de Investigación Científica y Técnica 2013-2016 no marco do Programa Retos Sociales. O proxecto iniciouse o ano pasado e rematará en 2019, e contempla a realización de dúas campañas no Golfo Ártabro. Ademais, enmárcase nunha colaboración iniciada en 2010 entre o Grupo de Ecoloxía Pesqueira do IIM de Vigo e o AZTI, centro tecnolóxico experto en innovación mariña e alimentaria.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

A IA predí como será a vida dos pacientes de esclerose múltiple dentro de 10 anos

Investigadores galegos empregan as resonancias magnéticas dos pacientes para prognosticar a evolución da enfermidade autoinmune cunha certeza do 90 %

O CSIC localiza na provincia da Coruña 180 posibles sitios arqueolóxicos

Grazas ás tarefas do Instituto de Ciencias do Patrimonio (INCIPIT), estes achados serán incluídos eventualmente no inventario arqueolóxico de Galicia

Galicia, o paraíso en disputa entre aves e eólica mariña

SEO/BirdLife advirte que as turbinas eólicas poden supoñer "un grave perigo nun dos corredores migratorios máis importantes do mundo”

Este cranio de quen é? Como identificar restos humanos con imaxes de antes e despois da morte

Un investigador do CITIC desenvolve un sistema que axudará a mellorar a metodoloxía da superposición craniofacial