Chile é o cuarto produtor de mexillón do mundo en nun futuro próximo a identificación das larvas da especie de maior interese comercial e social no país,Mytilus chilensis, podería realizarse con tecnoloxía desenvolvida polo Grupo e Inmunoloxía da Universidade de Vigo. Hai máis dunha década, este grupo, xunto co Centro de Investigacións Mariñas de Arousa, desenvolveu unha técnica de inmunodetección para a marcaxe específica de larvas de mexillón con anticorpos monoclonais co obxectivo de dispor dunha ferramenta de identificación rápida, doada e precisa. “Unha técnica que permitise discriminar as larvas de mexillón nas mostras de plancto procedentes das rías, co fin de facilitar os estudos de distribución espazo-temporal das mesmas, e a consecuente mellora do cultivo de mexillón”, explica a investigadora posdoutoral do grupo Silvia Lorenzo, que lembra, que xa daquela, comprobárase que dous anticorpos obtidos (mAb22.8 e mAb36.5) recoñecían larvas tanto do Mytilus galloprovincialis galego, como mediterráneo, así como da especie M. edulis, sen identificar as larvas doutros bivalvos como ostra, berberecho, ameixa fina e xaponesa e longueirón.
Anos despois, a técnica desenvolvida polas investigadoras e investigadoras, que agora levan a cabo o seu labor no Cinbio, espertou o interese da Fundación Chinquihue, unha organización privada sen fin de lucro, que ten o obxectivo de promover o desenvolvemento do sector pesqueiro artesanal en Chile, co obxectivo de mellorar a situación socioeconómica das e dos pescadores artesanais de Puerto Montt, onde se localiza a Fundación, que é coñecida como a Galicia de Chile. Para mellorar o cultivo a escala industrial do M.chilensis cómpre desenvolver estudios de distribución larvaria e dada a gran homoloxía entre esta especie e o M.galloprovincialis, probouse se os anticorpos desenvolvidos polo grupo de Inmunoloxía servirían para recoñecer larvas de mexillón chileno M.chilensis e non as outras dúas especies de mitílidos que existen na zona, Chorimytiluschorus e Aulacomya ater. “Usando larvas de cultivo comprobamos que estes anticorpos recoñecen larvas de mexillón chileno, M. chilensis, e non recoñecen as outras dúas especies de mitílidos, resultando, por tanto, útiles para a súa discriminación”, confirma Silvia Lorenzo.
Chile é actualmente o cuarto produtor mundial de mexillón
Unha vez confirmada a viabilidade da técnica os anticorpos serán aplicados sobre mostras de campo complexas e para facilitar o proceso de discriminación larvaria, o Grupo de Inmunoloxía está a colaborar nun proxecto da Fundación Chinquihue, co obxectivo de axudara a implementar a detección in situ das larvas cos anticorpos monoclonais. Así, trala visita que investigadoras e investigadoras da Fundación realizaron a Vigo para aprender a técnica con mostras das rías galegas, unha investigadora do laboratorio de Inmunoloxía viaxará en decembro a Chile para asesorar sobre o terreo aos seus colegas chilenos. Ademais de que a Fundación Chinquihue implante a tecnoloxía de inmunodetección no seu territorio, estudaranse novas vías de colaboración entre ambas as dúas institucións.
