Este é o cuarto episodio do pódcast Todas as correntes levan ao CIM, un pódcast de Gciencia en colaboración co Centro de Investigación Mariña (CIM) da Universidade de Vigo para afondar coa sociedade no coñecemento do mar. Na ‘Corrente IV’ falamos de acuicultura e xestión sostible dos recursos, utilizando o salmón dos ríos galegos como exemplo, coa investigadora Paloma Morán, catedrática do departamento de Bioquímica, Xenética e Inmunoloxía.
A xestión sostible dos ecosistemas é necesaria para asegurar o seu mantemento e a supervivencia das especies que viven neles. Con todo, esta xestión sostible tamén busca ter en conta as actividades humanas que se crean arredor dos ecosistemas, por exemplo, no que respecta á alimentación. Neste caso, o coidado dos ecosistemas, alén de intentar manter un equilibrio e non chegar á sobreexplotación, tamén ten como obxectivo lograr unha alimentación sa e segura.
No contexto concreto dos salmóns dos ríos galegos, estes deben enfrontar desafíos nas oscilacións periódicas entre natalidade e mortalidade. Así, vólvese necesario tomar accións tanto na súa fase de río como na súa fase de mar así como para reducir a mortalidade dos individuos reprodutores. Isto cobra especial relevancia cando as poboacións descenden por debaixo do límite crítico de conservación. Desta maneira, a xestión científica das poboacións de salmón busca equilibrar os factores críticos a través de datos e resultados observables co obxectivo de preservar as poboacións a longo prazo.
Episodio realizado por Laura Veiga
Edición: Carlos Tresandí
Escóitao nas plataformas de pódcast: Spreaker, Spotify, Ivoox, iHeart, Deezer, Podcast Addict, JioSaavn e Podchaser.