Únete á nosa canle de Whatsapp
Este é o quinto episodio do pódcast Todas as correntes levan ao CIM, un pódcast de Gciencia en colaboración co Centro de Investigación Mariña (CIM) da Universidade de Vigo para afondar coa sociedade no coñecemento do mar. Na ‘Corrente V’ falamos de cambio global e contaminación co investigador Mariano Lastra.
Os océanos tiveron ata agora un papel regulador no clima a través dunha serie de procesos físicos, químicos e biolóxicos que equilibran as fluctuacións naturais que se producen. Por desgraza, a situación actual de cambio climático provoca alteracións nos procesos naturais que regulan estes ecosistemas e o propio clima. Por este motivo, o persoal investigador do CIM traballa en estudos para coñecer as implicacións que ten todo isto a diferentes niveis, xa que o desenvolvemento de políticas de mitigación e adaptación, científicamente ben fundamentadas, é imprescindible para a supervivencia do planeta.
Un dos mellores laboratorios naturais do mundo atópase na Antártida e é alí onde desenvolven a súa investigación os científicos do CIM Mariano Lastra, Jesús Troncoso e Jesús López no marco do proxecto RADIANT. A iniciativa busca cuantificar os procesos de degradación das macroalgas que as correntes e mareas depositan na liña de costa e que funcionan como xeradores doutros procesos ecolóxicos asociados á súa descomposición. Concretamente, o proxecto busca estudar como se degradan as macroalgas en función de distintos niveis de radiación, o que pode afectar á cantidade de nutrintes dispoñibles no medio e, por outro lado, queren investigar se estas algas sometidas a diferentes niveis de radiación poden afectar ao consumo por parte de organismos herbívoros.
Episodio realizado por Laura Veiga
Edición: Carlos Tresandí
Escóitao nas plataformas de pódcast: Spreaker, Spotify, Ivoox, iHeart, Deezer, Podcast Addict, JioSaavn e Podchaser.
