Únete á nosa canle de Whatsapp
O investigador principal do CiMUS da USC, Ángel Carracedo, un dos mellores xenetistas a nivel internacional, foi recoñecido co Premio Otero Pedrayo 2022 pola súa traxectoria médica e científica. A distinción do premio cultural máis lonxevo de Galicia foi dada a coñecer onte tras a reunión do xurado dos galardóns, convocado pola Xunta e o catro deputacións provinciais. Este ano, estes premios nados en 1977 en honra a Otero Pedrayo recoñecen por primeira vez a traxectoria dun investigador. Hoxe, recolle o galardón no Muncyt da Coruña.
O xurado enxalzou a figura “privilexiada” do investigador, nacido en 1955 no municipio coruñés de Santa Comba e que ocupa desde 1994 a dirección do Instituto de Medicina Legal da USC. Carracedo ten na súa traxectoria o título de director da Fundación Pública Galega de Medicina Xenómica e do Centro Nacional de xenotipado e é presidente da Sociedade Española de Farmacoxenética e Farmacoxenómica. Ademais, tamén ocupa a vicepresidencia da Academia Internacional de Medicina Legal e a presidencia da International Society for Forensic Genetics. As súas investigacións céntranse na xenética do cancro, as enfermidades psiquiátricas en idade infantil, as enfermidades raras e a farmacoxenómica. Así mesmo, a súa figura tamén se erixiu como un importante formador de novas xeracións de investigadores.
