O ictus isquémico é, actualmente, unha das principais causas de mortalidade e discapacidade. Ao longo de tres anos, os investigadores do grupo Ictus Traslacional (TREAT) do Instituto de Investigación Sanitaria de Santiago (IDIS) e do grupo Bionanotools do Centro de Investigación en Química Biolóxica e Materiais Moleculares (CiQUS) da Universidade de Santiago (USC) conseguiron optimizar o único tratamento farmacolóxico existente para a fase aguda da enfermidade a través de nanopartículas.
O estudo acaba de ser publicado na revista Journal of Nanobiotechnology, unha publicación de alto impacto científico. Esta investigación foi coordinada polos investigadores do IDIS Francisco Campos e Clara Correa; e Pablo Pino, Beatriz Pelaz e Ester Polo dende a USC. O traballo tamén se desenvolveu como parte da tese doutoral da investigadora do CIQUS, Martina Migliavacca, unha das autoras principais.
Un único medicamento
O ictus isquémico orixínase pola presenza dun trombo que impide o fluxo sanguíneo cerebral. O único tratamento farmacolóxico na fase aguda é o activador do plasminóxeno tisular (rtPA), que desfai o trombo. “O problema deste tratamento é que só se pode administrar nas primeiras horas tras o inicio dos síntomas do ictus, ademais ten unha vida media curta, é dicir, degrádase rapidamente e nalgunhas circunstancias pode causar hemorraxias”, sinala a investigadora Clara Correa.
Neste traballo utilizouse a nanomedicina para evitar os efectos secundarios do rtPA, xa que as nanopartículas poden protexer o fármaco da súa degradación e dirixir o tratamento ao trombo, onde ten que facer efecto. Para iso utilizaron unhas novas nanopartículas, denominadas biomiméticas, formadas unicamente por membranas de plaquetas. Así as partículas encapsulan o rtPA e camúflano no sangue, evitando que se degrade e chegue ao trombo con maior facilidade.
“Mediante a encapsulación do fármaco conseguiuse protexer a súa actividade, aumentar a súa eficacia terapéutica e reducir os efectos adversos que causa”, sinala a investigadora Clara Correa. Ademais, levouse a cabo un proceso de liofilización destas nanopartículas, conseguindo que poidan conservarse e almacenarse a longo prazo, superando con éxito un dos principais obstáculos para a aplicación e comercialización de medicamentos.
Referencia: Thrombolytic therapy based on lyophilized platelet-derived nanocarriers for ischemic stroke (Publicado en Journal of Nanobiotechnology)
