Investigadores do Instituto de Investigación Sanitaria de Santiago (IDIS) identifican máis de 100 factores xenéticos novos e 155 xenes vinculados co desenvolvemento do cancro colorrectal. O estudo establece, por primeira vez, a relación de moitos deles con este tipo de tumores. Os resultados acaban de ser publicados na revista Nature Genetics, que recolle a investigación liderada por Ceres Fernández, do grupo de Medicina Xenómica do IDIS, coa participación doutros equipos de Estados Unidos e Reino Unido.
O cancro colorrectal é o máis frecuente en España cunha previsión de case 44.000 novos diagnósticos neste 2022, segundo a Sociedade Española de Oncoloxía Médica (SEOM). É ademais unha causa importante de mortalidade por cancro, cunhas 18.000 mortes ao ano tan só no noso país.
Máis de 100.000 pacientes
Neste contexto, a investigadora Ceres Fernández-Rozadilla traballou en colaboración con investigadores de centros punteiros como o Fred Hutch Cancer Center de Seattle, a Universidade de Edimburgo ou o ICR de Londres, para tratar de descifrar a xenética deste tipo de cancro a través da análise multiómica en máis de 100.000 pacientes con este tumor e máis de 150.000 casos control (individuos sans), de ascendencia europea e asiática.
O estudo realizou o maior metaanálise de asociación do xenoma completo neste tipo de tumor desenvolvido ata a data e logrou identificar 205 localizacións no noso xenoma que confiren risco de desenvolver esta enfermidade.
Participaron máis de 100.000 pacientes e máis de 150.000 casos de control
Ademais, levaron a cabo de forma complementaria análise de expresión xénica e metilación en máis de 1.000 mostras de mucosa colónica e 15.000 de múltiples tecidos para revelar outras 53 asociacións de risco adicionais.
Con toda esta información xenómica, conseguiron identificar 155 xenes con efectos altamente relacionados co risco de padecer cancro colorrectal, moitos dos cales non se vincularan ata o de agora co desenvolvemento destes tumores.
Os potenciais obxectivos
Grazas á identificación destes xenes, constátanse as funcións máis relevantes na determinación do risco de padecer cancro colorrectal, estando as variacións na homeostase colorrectal normal, a proliferación, a adhesión celular, migración, inmunidade e as interaccións microbianas relacionadas coa aparición destes tumores.
A análise en múltiples tecidos indica ademais de forma interesante que máis dun terzo dos xenes actúan probablemente fóra da mucosa do colon. Como indica a doutora Fernández-Rozadilla no estudo “os nosos achados ofrecen información sobre a oncoxénese colorrectal e destacan os potenciais obxectivos en tecidos para as novas estratexias de tratamento e quimioprevención en cancro colorrectal”.
Referencia: Deciphering colorectal cancer genetics through multi-omic analysis of 100,204 cases and 154,587 controls of European and east Asian ancestries (Publicado en Nature Genetics)
