Chega a Coruña a instalación ‘Big Neurona‘, un museo móbil interactivo con forma de neurona xigante onde os participantes poden penetrar nun labirinto de espellos e transitar polas diferentes partes que compoñen as neuronas recibindo información, resolvendo incógnitas e participando en actividades, talleres e xogos.
Esta orixinal instalación amosa aos visitantes, na sede coruñesa do Museo Nacional de Ciencia e Tecnoloxía (MUNCYT), o funcionamento das neuronas espello, a base da empatía entre as persoas, a través de actividades como ‘O espello empático’. Nela poden meterse na pel do outro mediante un software interactivo ou visualizar ilusións ópticas que fascinarán tanto a pequenos como a maiores. Xogos audiovisuais e obradoiros para desvelar respostas sobre as células que transmiten información no sistema nervioso completan a oferta de Big Neurona. Tanto Big Neurona como os talleres e actividades asociados a ela son de carácter completamente gratuíto e a súa entrada estará aberta ao público en xeral.
‘Big Neurona’ está deseñada para cativos e maiores e conta co apoio da FECYT
Inauguraron a instalación a directora do Museo Nacional de Ciencia e Tecnoloxía, MUNCYT, Marián del Egido, xunto a Casto Rivadulla, membro da Sociedade Española de Neurociencia, SENC, e profesor da Universidade da Coruña e o alcalde desta cidade, Xulio Ferreiro.
Nesta exposición en forma de neurona poderanse descubrir aspectos tan curiosos como que o cerebro representa un 2% do peso do noso corpo pero con todo consome un 25% de toda a súa enerxía. Ou que o noso cerebro é tan flexible que se nos puxésemos unhas lentes que nos fixesen ver o mundo ao revés nuns días afariámonos. O público paseará entre dendritas e axóns para coñecer o funcionamento da neurona.
Big Neurona é unha idea orixinal do Caleidoscopio e a Asociación Nacional de Investigadores Século XXI e contou con financiamento da Convocatoria de Axudas para o fomento da cultura científica e da innovación da Fundación Española para a Ciencia e a Tecnoloxía, FECYT.
