Hai 4.500 anos, unha vaga de humanos procedente do Cáucaso desprazouse cara ao sur do continente. E segundo sinala unha investigación realizada por científicos da universidade de Harvard, aniquilou practicamente á poboación masculina que vivía naquel momento na Península Ibérica. Así o sinala un traballo realizado por David Reich, investigador da Harvard Medical School, presentado esta fin de semana nun evento organizado pola revista New Scientist en Londres, e que pode mudar a historia do xenoma ibérico.
Mentres que noutras zonas de Europa houbo mestura, en Iberia a aniquilación foi case total
Estes humanos, coñecidos de forma xenérica como yamna, procedían do leste de Europa, sobre todo do Cáucaso, de onde partiron hai arredor de 5.000 anos. E en apenas centos de anos, expandíronse nun enorme territorio, substituíndo aos habitantes de cada zona. “Son os principais contribuíntes aos europeos de hoxe”, sinala Reich no seu traballo. Deste xeito, é posible que gran parte dos nosos xenes procedan destas poboacións.
O caso da Península Ibérica, segundo explica o científico de Harvard, foi chamativo. Unha especie de holocausto prehistórico, empurrado posiblemente por algunhas enfermidades que trouxeron con eles os invasores, e que se puido reconstruír a través da xenética. Porque o cromosoma Y que ata ese momento era característico de España e Portugal desapareceu completamente despois da chegada dos yamna. Ata o 90% do xenoma foi reemprazado, mentres que en outros puntos de Europa a mestura foi maior, sen chegar a desaparecer completamente as trazas xenéticas anteriores aos yamna. Isto suxire que o home ibérico foi masacrado, e que os yamna comezaron a ter descendencia coas mulleres que ata entón vivían na Península, aínda que o estudo non afonda neste asunto.
Os yamna posuían, segundo se expón no traballo, algunhas vantaxes tecnolóxicas, como un maior desenvolvemento da roda e cabalos domesticados. Ademais, algúns estudos, nos que tamén participou David Reich, apuntan que estes pobos foron os ‘pais’ da difusión das linguas indoeuropeas polo oeste de Europa.
