Foi, segundo testemuñas presenciais, un estrondo que parecía vir do subsolo, ou como se un camión de gran tonelaxe pasara de súpeto pola rúa. Milleiros de persoas puideron percibir o pasado sábado, ás 20.55 da noite, o sismo de magnitude 3,8 (segundo o IGN) que tivo como epicentro un punto situado a catro quilómetros ao sudeste da localidade de Melgaço, vila fronteiriza con Galicia. Porén, o Instituto Português do Mar e da Atmosfera (IPMA) rebaixa a súa magnitude a 3,5.
Desde ese momento, o Instituto Geográfico Nacional comezou a recibir respostas aos cuestionarios que ten dispoñibles na súa web para estudar os efectos dos terremotos. Foron preto de 200 chamadas (197, segundo os últimos datos) que deron conta dunha intensidade que chegou ata o IV na Escala de Mercalli.
Os avisos ao IGN deron conta de vibracións nos edificios, na louza e nos cristais nos lugares próximos ao epicentro
Os sismólogos distinguen a escala de magnitude, como Richter ou a mbLg, usada na península Ibérica, das escalas de intensidade, que serven para clasificar un sismo en función dos seus efectos nas persoas, nos edificios e obxectos e na natureza.
Así, o terremoto rexistrado en Melgaço o pasado sábado acadou a intensidade IV segundo os datos enviados desde dous puntos do concello ourensán de Padrenda (lugares de A Notaría e A Quinta), Gomesende (Dornelas), Lobeira (Ermille) e os municipios pontevedreses de Crecente e As Neves. Do mesmo xeito, o IPMA calculou tamén esta intensidade ao recibir testemuños desde localidades como Melgaço, Braga e Viana do Castelo.
Ademais, decenas de avisos remitidos desde diversos puntos das provincias de Pontevedra e Ourense chegaron a describir efectos correspondentes a unha intensidade III.
Segundo explica o propio IGN, nos sismos de intensidade IV apenas hai danos, pero son amplamente percibidos pola poboación, sobre todo dentro dos edificios, e chegan a espertar a algunhas persoas. Son vibracións moderadas, nas que as persoas sinten un leve tremor nos edificios e nos obxectos, e poden chegar a vibrar a louza, os cristais, as fiestras e as portas, ademais de oscilacións nos obxectos pendurados.
Consulta aquí todos os lugares nos que se sentiu o terremoto do pasado sábado 17.
