Únete á nosa canle de Whatsapp
Este xoves cúmprense cinco anos da inauguración do Museo Nacional de Ciencia e Tecnoloxía (Muncyt) da Coruña, situado no barrio de Labañou. Neste lustro, centenares de miles de persoas pasaron polas súas instalacións.
Para celebrarlo, a entidade programou numerosas iniciativas ao longo do mes, entre as que destacan o Día da Ciencia na Rúa, este sábado 6, un monólogo humorístico de Miguel Lago, concursos e exposicións fotográficas, música e obradoiros de ciencia e tecnoloxía.
O Muncyt, inagurado polos reis de España o 4 de maio de 2012, alberga interesantes pezas, como o primeiro acelerador de partículas de España, deseñado e construído pola Xunta de Enerxía Nuclear en 1957; un computador IBM 650, o primeiro que chegou ao noso país da man de RENFE en 1959; ou a cabina do Boeing 747 que trouxo o Guernica desde Nova York a España en 1981.
O Muncyt da Coruña recibiu en 2014 unha mención especial no Certame ao Mellor Museo Europeo de 2014 de Tallín (Estonia) “pola súa capacidade para comunicar conceptos científicos e técnicos, o seu compromiso e responsabilidade social e por conservar o patrimonio tecnolóxico, industrial e científico de España e Galicia”.
O edificio forma parte do plan de descentralización da entidade que xestiona o museo. A primeira sede abriu as súas portas en Madrid, no paseo das Delicias, hai agora 20 anos.
