O turismo astronómico é un máis dos moitos atractivos dos que goza o Parque Nacional das Illas Atlánticas. Despois da súa declaración como destino Starlight, que recoñece aqueles lugares onde o ceo se atopa libre de contaminación lumínica, a Consellería de Medio Ambiente da Xunta acaba de instalar catro cartas estelares en outros tantos puntos das Illas Atlánticas para que os visitantes teñan unha guía desde a que observar o ceo.
Os catro planisferios, situados no Alto da Campá nas Cíes; na zona de Caniveliñas, en Ons; en Punta Fradiño, en Cortegada; e na Aldea de Sálvora, son unha ferramenta que permitirá aos usuarios identificar cales obxectos celestes permanecen visibles e cales están ocultos no ceo.
O impulso ás actividades que fomenten o turismo astronómico é un dos principais obxectivos que se marca o órgano conservador do parque, de acordó á Carta Europea de Turismo Sustentable. Entre estas iniciativas, destacan as charlas divulgativas, as actividades infantís, os roteiros de fotografía nocturna e as visitas con astrónomos afeccionados, que contaron coa participación de máis de 10.000 persoas durante 2016.
