Vigo sae á rúa para celebrar dende este xoves a Semana da Ciencia, cunha serie de obradoiros científicos e conferencias, que terán lugar no museo MARCO da cidade, na rúa do Príncipe da cidade olívida, nunha actividade organizada polo Concello coa colaboración de GCiencia.
As actividades da Semana da Ciencia comezarán ás 10 da mañá deste xoves 29 de novembro, cos obradoiros escolares sobre a ciencia das illas Cíes, con seis postos nos que profesionais da bioloxía e das ciencias mariñas amosarán aos estudantes de Primaria fenómenos como o afloramento, que garante a riqueza das rías galegas; a diversidade especies mariñas; os sistemas ecolóxicos; ou a importancia de que aves mariñas como as gaivotas teñen para a riqueza natural do noso mar.
Ademais, dos obradoiros, os escolares vigueses disfrutarán de vídeos divulgativos comentados polo biólogo Manuel Garci, do Instituto de Investigacións Mariñas de Vigo (CSIC).
Estes obradoiros de mañá, nos que participarán preto de douscentos escolares de Vigo, van repetirse tamén o venres.
Pola tarde, chegarán as actividades dirixidas ao público en xeral, con senllas conferencias. Este xoves, a charla correrá a cargo do químico Antón Salgado, da Universidade de Vigo, que falará sobre “O fenómeno do afloramento costeiro”, a partir das 20.00 horas, no auditorio do Museo Marco, con entrada libre e gratuita ata completar o aforo.
O venres, a conferencia será do biólogo Francisco Rodríguez, do Instituto Español de Oceanografía (IEO), baixo o título: “Un mar de cores para o Nautilus”, no que os asistentes poderán ver in situ o espectáculo das algas bioluminiscentes. Será tamén ás 20.00 horas con entrada libre e gratuita.
Con estas actividades, o Concello de Vigo celebra a Semana da Ciencia, en colaboración co GCiencia, achegando a importancia da investigación a públicos diversos.
