A investigadora do Instituto Galego de Física de Altas Enerxías (IGFAE) e profesora da USC Elena G. Ferreiro acaba de ser nomeada como presidenta da xunta directiva do novo proxecto europeo na vangarda dos estudos sobre a interacción forte STRONG-2020. A iniciativa, dotada con 10 millóns de euros, ten por obxectivo abordar as cuestións abertas desde o punto de vista teórico e experimental sobre a forza nuclear forte, a responsable de manter unidos os protóns e neutróns no interior do núcleo atómico.
Como parte do seu cometido, Elena G. Ferreiro encargarase da dirección, coordinación e supervisión do paquete de accións incluído neste proxecto, integrado no programa Horizonte 2020, e que involucra a 44 institucións internacionais.
O estudo da interacción forte ocupa a unha comunidade investigadora de 2.500 persoas de 36 países europeos traballando con colisionadores de partículas que requiren desenvolvementos continuos en detectores, sistemas de adquisición de datos, feixes e brancos, ademais dun marco teórico adecuado para analizar os resultados experimentais.
Dentro dos grupos españois involucrados en STRONG-2020, o IGFAE é un dos centros cun papel de liderado destacado. Ademais de Elena G. Ferreiro, o investigador e director do IGFAE Carlos Salgado participa na súa organización a través do Steering Committee, mentres que Néstor Armesto coordina unha das áreas de traballo, dedicada a estudos de dispersión inelástica profunda (DIS) no LHC e futuros experimentos.
Elena G. Ferreiro, autora de máis de 265 artigos de investigación con máis de 16.000 citas, tamén forma parte do comité directivo da División de Física Nuclear da Sociedade Europea de Física e colabora con grupos destacados no IPN Orsay (Institut de Physique Nucléaire) y École Polytechnique. No IGFAE, é coordinadora dunha das tres áreas estratéxicas de investigación: “O Modelo Estándar ata os límites”.
Elena Ferreiro é unha aposta segura polo futuro científico de Galicia
Que alegria ver Galiza laborando nas fronteiras da ciência; e que magnífico de que a protagonista seja feminina. Parabéns doutora!!