O Consello Europeo de Investigación (ERC) anunciou no mediodía deste xoves a concesión a 34 proxectos científicos das axudas Synergy Grant, unha das convocatorias máis competitivas e prestixiosas á que poden acceder os investigadores e investigadoras na Unión Europea. E dous científicos galegos, que lideran grupos baseados en Santiago de Compostela, serán investigadores principais de iniciativas cun orzamento de arredor de nove millóns de euros.
Trátase de Diego Peña Gil, do Centro Singular de Investigación en Química Biolóxica e Materiais Moleculares (CiQUS) da Universidade de Santiago de Compostela, e Felipe Criado Boado, do Instituto de Ciencias do Patrimonio (Incipit), pertencente ao CSIC. Neste último caso, Criado colaborará co equipo doutro investigador galego, Luis M. Martínez Otero, do Instituto de Neurociencias de Alicante, tamén do CSIC.
📣New ERC Synergy Grants: 34 research groups will receive €350 million in total to address some of the world’s most formidable research problems – PRESS RELEASE https://t.co/5Quz2Ju5j9 #EUfunded #ERCSyG
— European Research Council (ERC) (@ERC_Research) November 5, 2020
As Synergy Grant financian iniciativas que, pola súa complexidade, deben involucrar a grupos de investigación de diversas institucións e eidos de coñecemento, para achegarse á cuestión desde distintos enfoques. “A intención é que traballen en proxectos ambiciosos nun amplo rango de disciplinas científicas”. Están liderados por entre 2 e 4 investigadores principais, e cada un dos grupos repártese os nove millóns de euros de financiamento, que se investirán durante varios anos para a contratación de persoal e o desenvolvemento das investigacións.
Diego Peña Gil
O químico Diego Peña Gil (Santiago de Compostela, 1974), será un dos investigadores principais do proxecto MolDAM (Single Molecular Devices by Atomic Manipulation), no que colaborará cos grupos de Leo Gross, no IBM Research de Zurich (Suíza) e Jascha Repp, da universidade alemá de Ragensburg (Ratisbona, en galego ou castelán).
Diego Peña: “Queremos estudar e controlar moléculas ata o máis mínimo detalle”
Felipe Criado Boado
Por outra banda, o arqueólogo Felipe Criado Boado (Santiago de Compostela, 1960), director do Instituto de Ciencias do Patrimonio (Incipit) e profesor de investigación do CSIC, será un dos catro investigadores do proxecto XScape (Material Minds: Exploring the Interactions between Predictive Brains, Cultural Artifacts, and Embodied Visual Search), xunto a Luis M. Martínez, tamén do CSIC, Andy Clark, da universidade inglesa de Sussex, e Johannes Mueller, da universidade alemá de Kiel.
