O mozo ourensán David García Pérez, de 23 anos, graduado en Enxeñaría Aeroespacial pola Universidade Politécnica de Madrid (UPM), acaba de ser escollido pola NASA para participar nun programa de investigación que se desenvolverá nas instalacións que a axencia espacial europea ten en Mountain View, California.
Segundo explica David García a varios medios, no mes de setembro acudiu á UPM unha antiga alumna da Escola de Enxeñaría Aeronáutica que foi contratada na NASA despois de participar nun programa de formación. Na súa visita tamén estaba contemplado un proceso de selección para recrutar a algún estudante para a axencia.
David pasará medio ano nun programa de formación en Mountain View, California
Despois deste proceso, o que en principio ía ser unha bolsa de tres meses coa universidade de Illinois acabouse convertendo nun programa de medio ano. Para conseguilo, debiu presentar un artigo sobre a dinámica de fluídos aplicada a novos conceptos de drones, que se poderían usar como transporte privado aéreo e como medio de envío de paquetería, ideas nas que xa traballan grandes empresas como Amazon, Uber e Airbus.
David García estuda actualmente o segundo curso do máster en Enxeñaría Aeronáutica na universidade madrileña. O ano pasado xa recibira un recoñecemento de excelencia, ao ser premiado co mellor expediente na especialidade de Vehículos Aeroespaciais dentro do grao de Enxeñaría Aeroespacial, que acabou cun 8,95 de nota media. En Ourense estudou no colexio Concepción Arenal e no IES As Lagoas, onde terminou cunha media de 10 e un premio á excelencia preuniversitaria.
