A sede central do Consello Superior de Investigacións Científicas (CSIC) en Madrid acolleu este mércores un acto de recoñecemento que reuniu a preto dun centenar de investigadoras da institución. Unha homenaxe ao traballo de moitas das científicas que, no seu momento, foron pioneiras nos seus campos. E entre elas, nun lugar destacado, estaba a galega Tarsy Carballas (Taboada, 1934), unha referencia no estudo dos solos húmidos. No acto tamén participaron outras investigadoras como Ana María Viéitez, do Instituto de Investigacións Agrobiolóxicas de Galicia.
“Con este acto queremos recoñecer o voso labor. É saldar unha débeda que tiñamos con todas vós, as nosas pioneiras”, subliñou a presidenta do CSIC, Rosa Menéndez, que presidiu a homenaxe, diante dun salón de actos cheo. “É un acto para poñer nome, apelidos e cara ao labor que realizastes, e para mostrar que a ciencia española ha crecido grazas á colaboración das súas científicas”, engadiu. O acto foi conducido pola investigadora do CSIC Flora de Pablo e contou coa intervención de Pilar López Sancho, presidenta da Comisión de Muller e Ciencia do CSIC, e das investigadoras homenaxeadas Tarsy Carballas e Dolores Cabezudo.
Na homenaxe destacouse, ademais de Tarsy Carballas, a traxectoria de científicas como Josefina Castellví, pioneira da investigación antártica e primeira muller que dirixiu a Base Antártica Española Juan Carlos I; Teresa de Pedro, experta en robótica e precursora dos programas de intelixencia artificial; María Ángeles Durán, experta mundial no estudo do traballo non remunerado, como é o dedicado á familia e o fogar; Margarita Salas, precursora da bioloxía molecular e autora da patente máis rendible do CSIC; Laura Iglesias, experta en observacións de espectroscopía para estudar o movemento das estrelas; Elvira Gangutia, pioneira no estudo da filoloxía grega e na dirección do Dicionario Grego-Español; Gabriela Morreale (1930-2017), bioquímica que desenvolveu o método coñecido como a proba do talón, que prevén o atraso mental infantil; ou Dolores Cabezudo, química analítica especializada no estudo dos alimentos.
