Ao servizo e na procura de proxectos de alta tecnoloxía que poidan alimentar a industria da automoción, a incubadora High Tech Auto (HTA), na Zona Franca de Vigo, vén de lanzar a súa cuarta convocatoria.
Dez iniciativas serán seleccionadas para garantir que cheguen ao mercado e ás portas das aceleradoras de empresas, con éxito. En menos de dous anos de funcionamento, saíron desta incubadora 14 empresas constituídas e 8 prototipos.
Nas instalacións da HTA, os responsables de proxectos que xa reciben o seu apoio describen o seu traballo: desde unha plataforma dixital para o mantemento óptimo de vehículos de recollida de lixo ata un dúas rodas de manexo intuitivo e seguridade máxima para o usuario, pasando por unha nova experiencia de audio inmersiva mentres conducimos.
Todas as ideas son benvidas nesta incubadora, aseguran os seus responsables, incluso aquelas procedentes doutros sectores cos que establecer pontes.
