O xenial debuxante Luís Davila sorprendíanos hai un ano con esta tira para o calendario da Universidade de Vigo. Toda unha reflexión sobre o galego na ciencia. Recuperámola porque esta semana, en GCiencia celebramos a Semana da Ciencia cunha ampla programación, organizando obradoiros científicos para escolares o xoves 29 e o venres 30 no museo Marco, na cidade de Vigo. Haberá tamén dúas conferencias, con dous grandes científicos e divulgadores: a primeira, a cargo de Antón Salgado, da UVigo, este xoves, ás 20.00 horas, no auditorio do Museo Marco, que nos falará dos segredos da riqueza submarina das illas Cíes co título “O fenómeno do afloramento costeiro”; a segunda, o venres 30, ás 20.00 horas, a cargo de Fran Rodríguez, do IEO, que encherá de luz o auditorio do museo para falarnos das algas bioluminiscentes co título “Un mar de cores para o Nautilus”. As dúas charlas son con entrada libre e gratuita ata completar o aforo.
Parabéns pola semana da ciencia!