Non están todos os que son (este portal non rexistra os voos militares, por exemplo), pero si son todos os que están. Na pasada fin de semana, a web Flightradar24 publicou unha imaxe que está voando a toda velocidade polas redes sociais. Segundo os datos compilados por este portal, o pasado venres 29 de xuño foi o día con “maior ocupación dos ceos” desde que botou a andar a web. E, moi probablemente, o día con maior ocupación de avións na historia do planeta, debido ao rápido aumento do tráfico aéreo nos últimos anos.
O portal rexistrou, exactamente, 202.157 voos. Foi a primeira vez que se superaron os 200.000 nun só día. E no momento álxido, chegou a haber 19.000 avións no aire ao mesmo tempo. Este GIF compartido por Flightradar24 é o mellor xeito de albiscar a intensidade do tráfico áereo.
Yesterday was the busiest day of the year in the skies so far and our busiest day ever. 202,157 flights tracked! The first time we’ve tracked more than 200,000 flights in a single day on https://t.co/krDfUYSbzK pic.twitter.com/ApCMHaVEQp
— Flightradar24 (@flightradar24) 30 de junio de 2018
É unha imaxe impactante, que dá conta do impoñente grao de desenvolvemento do transporte no planeta, pero tamén unha noticia preocupante para o medio ambiente e a sustentabilidade. Nun voo de ida e volta entre Santiago e Frankfurt, por exemplo, o avión emite 461 quilos de CO2 por cada pasaxeiro, unha evidencia da enorme cantidade de gases de efecto invernadoiro que a aviación comercial emite á atmosfera.
