O piñeiro é unha árbore que está no ADN de Galicia. Algunhas das súas especies, como o Pinus sylvestris xa estaban nos montes galegos hai 10.000 anos, nas últimas glaciacións. Pero outras variedades foron importadas ao longo dos séculos. E non hai que esquecer que o propio himno galego corresponde a un poema que leva por título ‘Os pinos‘.
Pero a importancia do piñeiro en Galicia tamén é hoxe a do sector económico de aproveitamento forestal. E para a súa mellora traballa o Centro de Investigación Forestal de Lourizán, onde os científicos estudan aspectos como as melloras xenéticas para aumentar a calidade e a produtividade da madeira.
O CIF de Lourizán forma parte do grupo operativo supraautonómico GenMaC (Recursos xenéticos para o abastecemento sostible de madeira de calidade de coníferas). Este grupo foi creado para promover o uso dos mellores materiais forestais de reprodución para incrementar a produtividade e calidade da madeira para ser competitivos en toda a cadea forestal.
Dentro deste grupo operativo, CIF Lourizán deseñou este vídeo no que se explica que é a mellora xenética e cal é o traballo dos melloradores xenéticos.
