A ciencia ten que comprender os mecanismos de transmisión das doenzas para saber atallalas. Desde os virus causantes de doenzas como a gripe ou o ébola, que causan milleiros de vítimas, ata os patóxenos que infestan os vexetais e causan tamén graves perdas económicas. Estes patóxenos que afectan aos vexetais viaxan dunha planta a outra mediante a acción dos elementos, ou ben transportados por animais ou pola acción humana. Para coñecer máis o mecanismo polo cal a chuvia transporta as esporas causantes da doenza, investigadores da universidade de Cornell, nos Estados Unidos, estudaron moi polo miúdo como unha soa pinga de choiva libera e transporta esporas do fungo Puccinia triticina, causante de enfermidades en distintos grans de cereal.
Segundo recolle a Axencia Sinc, os investigadores usaron imaxes de alta velocidade para desenvolver modelos informáticos e analizar a dispersión das esporas do fungo despois do impacto dunha pinga de choiva na planta infectada, como se pode ver neste vídeo.
O traballo, publicado en PNAS, expón que cando unha pinga de choiva cae sobre unha folla, libera miles de esporas secas, unha cantidade que aumenta en función da velocidade da caída. Á súa vez, o impacto da auga xera un vórtice de aire ao redor do líquido que dura uns milisegundos.
Este remuíño impulsa as esporas cara a arriba, o que permite que o vento as recolla e as transporte lonxe da superficie da planta, ao longo de varios quilómetros. Desta forma, os patóxenos presentes nesas esporas poden contaxiar a outras.
Ata agora sabíase que as pingas de auga cun tamaño inferior a 0,1 milímetros, con patóxenos recollidos dunha planta ao chocar contra as súas follas, poden ser transportadas facilmente polo aire.
Este traballo axuda a entender como as pingas grandes, que son demasiado pesadas para viaxar polo vento longas distancias, tamén participan neste proceso de contaxio de enfermidades, ao impactar e liberaren esporas secas das plantas infectadas.
“O mecanismo de dispersión a través dun vórtice de aire podería explicar o aumento abrupto de esporas secas na atmosfera inmediatamente despois de que se produzan precipitacións”, sinalan os expertos no estudo.
Segundo os autores, “estes achados poderían estenderse a cultivos afectados por outras enfermidades da Puccinia triticina, como o do café e o millo”.
Referencias: Vortex-induced dispersal of a plant pathogen by raindrop impact (Publicado en PNAS o 25 de febreiro de 2019).
