Non é a primeira vez que o raio azul, un raro fenómeno óptico que coincide co momento da posta do Sol, se capta en Galicia. Pero o difícil de retratalo co obxectivo dunha cámara e a auréola mítica que o rodea convérteno nun salientable acontecemento cada vez que hai noticias del. A última delas tivo lugar o pasado 11 de xaneiro desde a praia da Lanzada, no Grove, onde o fotógrafo Antonio Costa foi quen de acertar no momento exacto no que o raio azul escintilaba sobre o astro rei no solpor.
O raio azul, como o verde (algo máis habitual, pero tamén pouco frecuente) adoita producirse xusto despois do amencer ou antes do solpor. Ten a súa explicación en que nunhas determinadas condicións, a atmosfera produce un fenómeno de dispersión e difracción das ondas de luz que anula algunhas cores do espectro visible para os humanos, mentres que maximiza outras ondas. No caso do azul, son as ondas arredor dos 450nm, mentres que o verde está nos 525nm.
A fermosura do fenómeno fixo espertar a imaxinación de artistas e escritores, como Jules Verne, que lle dedicou un libro no que narra a apaixonada busca deste fenómeno, e tamén se mencionaba no filme Piratas do Caribe como unha especie de mito. O raio azul captado por Antonio Costa este mes é un dos poucos documentos gráficos no mundo que amosan a súa presenza. En Galicia, o fotógrafo Alfredo Madrigal conseguiu capturalo en xuño dos 2016 nos cantís de Loiba, sendo a primeira vez que se documentaba en Galicia.
Tal e como explica Antonio Costa no seu blog Cova de Paralaia, o raio azul foi captado no marco dunha “posta de sol espectacular”, na que tamén puido retratar un parhelio “moi intenso” e un “tenue pilar solar”. Costa séntese “moi afortunado”, xa que se ben puido captar o raio verde en varias ocasións no último decenio, é a primeira vez que puido fotografar o raio azul.
Me sorprende que también vosotros sigáis insistiendo en la rareza del rayo verde. La verdad es que, si el horizonte está despejado en el momento de la puesta de sol sobre el mar se ve casi siempre en Galicia, sobre todo si empleamos un teleobjetivo de 200mm. o más. Yo tengo varias fotos del fenómeno y estoy seguro de que habrá muchísimas más por ahí.
Un saludo.
Rafael.