Marte en color en imaxes tomadas polo vehículo de exploración Perserverance, que amartizou no planeta vermello este pasado xoves tras unha viaxe de millóns de quilómetros dende a Terra.
A NASA recibiu agora as primeiras imaxes con distintos tons do planeta vermello tomadas desde o cráter Jezero. A maior misión de exploración a Marte da historia tomou terra sobre as 22.00 deste xoves (hora peninsular en España) co obxectivo de atopar rastros de vida no que foi o leito dun lago fai millóns de anos. Trátase da misión máis ambiciosa da NASA ata o momento. “Eu aínda non o creo; é que entrar a Marte a 20.000 quilómetros por hora e que non se danara nada é sorprendente”, recoñecía a directora de voo da misión, Diana Trujillo.
“Perseverance está vivo na superficie de Marte”. Así se anunciou na sala de control da axencia espacial dos Estados Unidos a aterraxe do vehículo nun cráter do hemisferio norte do planeta, entre aplausos do equipo da misión. O Perseverance —un prodixio da técnica dunha tonelada desenvolto en colaboración con países europeos, incluída España— é un coche de seis rodas equipado con sete instrumentos científicos. É o vehículo máis pesado, complexo e caro que a NASA enviou á superficie de Marte: uns 2.200 millóns de euros.
O obxectivo da misión é buscar signos de vida microbiana antiga, colleitar e traer mostras de rocha e regolito (rocha rota e po), caracterizar a xeoloxía e o clima de Marte e achandar o camiño para a exploración humana ‘in situ’. A misión oficial durará algo menos de dous anos, aínda que probablemente vai alongarse moito máis, como aconteceu con rovers anteriores como o Curiosity.
