Unha imaxe que nunca viras: o polo norte do Sol

A imaxe que se ve sobre estas liñas é algo nunca visto ata agora. Grazas á astronomía e á exploración espacial coñecemos xa moitas fotografías do Sol, pero ata o de agora era case imposible captar os seus polos. Ata que, hai uns días, a Axencia Espacial Europea deu a coñecer as imaxes tomadas polo satélite Proba-2, nas que se pode ver o polo norte do Sol.

A maioría dos astros do Sistema Solar orbitan, máis ou menos, no mesmo plano, preto do ecuador do Sol, con poucas variacións (o coñecido como plano eclíptico). Esta é a razón, entre outras, polas cales os foguetes adoitan lanzarse desde preto do ecuador, xa que así é máis sinxelo e require menos esforzo acadar un maior impulso cara ao exterior.

Publicidade

Por este mesmo motivo, é moi difícil desde os satélites albiscar os polos do Sol. Nos anos 90, a sonda Ulysses remitiu datos moi relevantes ao respecto, despois de facer unha gran viaxe, impulsándose grazas á influencia de Xúpiter. Pero Ulysses non levaba cámaras.

Reconstrución do polo norte

O que conseguiu Proba-2 non é unha fotografía real, pero si se pode parecer moito ao que sería a imaxe auténtica do polo norte do Sol. “Os polos non poden ser vistos directamente, pero a nave tomou datos da atmosfera solar e de todo o que podía ver arredor dela”, explicou a Axencia Espacial Europea.

Así, capa a capa, mentres o Sol ía rotando, Proba-2 recolleu todos os elementos precisos para combinalos e facer a reconstrución do polo norte solar. A imaxe reúne as observacións da cámara para reconstruír o posible aspecto que tería.

A liña que divide a imaxe en catro partes débese aos cambios que aconteceron na atmosfera solar mentres se tomaban os datos que serviron para compoñer a imaxe. Vese tamén como, na parte superior dereita, hai un zona brillante máis ancha, debido a un furado coronal en latitudes baixas que xira arredor do disco solar. A zona do polo norte, a máis escura da imaxe, é “unha fonte de vento solar rápido”, explica a ESA.

No 2020, a ESA ten previsto lanzar a Solar Orbiter, unha misión coa que se poderá estudar con moito maior detalle as latitudes altas do Sol. Achegará tamén información valiosa sobre o campo magnético solar e as emisións de partículas que poden chegar a afectar á Terra.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Estas son as cinco espectaculares imaxes do universo capturadas polo telescopio Euclid

O observatorio da ESA retrata, nun só día e con gran detalle, cúmulos de galaxias e estrelas e tamén presenta unha decena de artigos científicos

Investigadores de Vigo proban con éxito un deseño de antena para un vehículo lunar

O dispositivo facilitará o sistema de comunicación durante as incursións das covas atopadas no satélite

Como medir as estrelas para revelar os misterios da Vía Láctea

Os investigadores do CITIC Xabier Pérez e Lara Pallas participan na misión Gaia, que pretende crear o maior mapa 3D da nosa galaxia

Unha paisaxe invernal en Marte? Esta imaxe demostra que non todo é o que parece

A misión espacial Mars Express ofrece unha espectacular fotografía do cráter Korolev para conmemorar os quince anos en órbita no planeta vermello