Desde o cabo de Santo Hadrián, fronte ás Illas Sisargas, en Malpica de Bergantiños, ata o cabo Prior, en Ferrol, hai case 50 quilómetros en liña recta por mar, aínda que por terra o percorrido é por forza máis longo. Nos días claros, pode observarse todo este tramo de costa, un dos máis extensos que pode albiscar o ollo humano no litoral de Galicia. E en novembro de 2020, unha fermosa casualidade, na que confluíron as condicións do tempo atmosférico coa situación do Sol ao poñerse, dou pé a unha fotografía dun instante que, de seguro, pouca xente ten a sorte de ver.
Na parte do sur do Prior, nunha zona coñecida como A Cova, David Couce estaba preparado coa súa cámara. “Desde fai uns días tiña calculado que dende un tramo de costa de Covas, o Sol ía poñerse xusto por detrás da Illa Grande das Sisargas”, explica. E aquel día estaba no momento e o lugar indicado. Tal e como acontecera en ocasións anteriores nas que David retratara o raio verde, o ceo estaba despexado e non facía vento. Mais hoxe, o atractivo engadido era o de captar o fenómeno xusto por riba do faro da Illa Grande. Esta é a secuencia completa, sorprendente pola extraordinaria luz do escintileo verde sobre o Sol.
#RayoVerde ☀️⚡️❇️
Lo último que se ve en el horizonte desde la costa Ártabra son las islas Sisargas con su faro, a 48 kilómetros en línea recta.
Hoy se dieron las condiciones para pillar el sol poniéndose justo detrás de las islas y su faro, y con rayo verde de regalo! pic.twitter.com/our8EZWdmf
— David Couce (@DavidCouce) November 16, 2020
Que é o raio verde?
O fenómeno coñecido como raio verde adoita producirse xusto despois da saída do Sol ou antes do solpor. É debido a que en determinadas condicións a atmosfera produce un fenómeno de dispersión e difracción das ondas de luz que anula algunhas cores do espectro visible para os humanos, mentres que maximiza as ondas arredor dos 525nm, que se corresponden cos tons verdosos. É pouco habitual velo, e aínda menos retratalo. Artistas e escritores como Jules Verne (que lle dedicou un libro á súa procura) teñen moito falado sobre el. Tamén se mencionaba no filme Piratas do Caribe como unha especie de mito.
Hai outra variante, menos habitual: o raio azul ou violeta. Para observalo, é preciso que se maximicen só as ondas de luz arredor dos 450nm. Ata hai pouco tempo había escasos documentos gráficos no mundo que amosen a súa presenza. Nos últimos anos, foi observado e retratado en varias ocasións en Galicia. O primeiro retrato do que hai constancia é o de Alfredo Madrigal, que o observou en Loiba en 2016.
Cuando vemos o raio verde no sol en realidades xa esta por en baixo da liña do horizonte fai uns 8 minutos….. E o efecto óptico da atmósfera a que fai que o vexanos ainda.