Despois de días de incerteza sobre a data e o lugar onde caería a nave rusa Progress M-27 M, fóra de control dende finais de abril, o misterio resolveuse. O cargueiro espacial desintegrouse esta madrugada ás 4:04 h (hora peninsular española) nalgún punto indeterminado sobre as augas do océano Pacífico. Así o confirmou a axencia espacial rusa Roscosmos que, en principio, non informou de que se producise ningún dano. O cargueiro M-27 M (da misión Progress 59) transportaba subministracións para a Estación Espacial Internacional (ISS) tras ser lanzado o 28 de abril dende o cosmódromo de Baikonur (Kazakstán). Nas súas adegas levaba preto de 2,5 toneladas de carga, que incluía combustible, osíxeno, alimentos, equipos científicos e diverso material para os tripulantes do complexo orbital. Non había ningún compoñente crítico para a estación, pero o incidente obrigará a acelerar a vindeira misión de reabastecemento. Cargueiros similares (como o que aparece na imaxe) seguirán operando, aínda que os responsables da misión analizarán o que fallou.
