No censo da fauna de Galicia hai que apuntar dende agora un novo tigre, que vive no monte da Madroa, nos altos da cidade de Vigo. Martín é un exemplar de mediana idade, que ten uns 9 anos, adoitando vivir como media en catividade uns vinte anos. Aínda que o Panthera Tigris é un gran felino orixinario de Siberia, que chegou a adaptar o seu hábitat ás calidas terras da India, no caso de Martín procede dunha capital turística do Mediterráneo: Benidorm. Dende o seu zoo vén de ser trasladado a Vigo, despois de que fora rexeitado polos machos que o acompañaban no recinto de Terra Natura.
Martin, que permanece pechado mentres se adapta ao seu novo hábitat, compartirá espazo coa tigresa Kenia, que recentemente perdeu á súa nai, Duches, tras padecer esta un cancro de pel.
Os coidadores de Vigozoo din que é un macho tranquilo, duns 200 quilos, e confían en que lle faga compaña a Kenia, algo que pode acontecer nos parques zoolóxicos, pero que non sucede na natureza, onde o tigre é unha especie moi territorial e solitaria, mesmo violenta con outros conxéneres cando os atopa en liberdade.
