A Área de Normalización Lingüística da UVigo ten novo calendario para 2018. Despois do éxito das tiras cómicas do debuxante Luis Davila, que acadaron cifras históricas de impacto en redes sociais, o artista pontevedrés Kiko da Silva será o encargado de ilustrar o ano que acaba de comezar. 12 debuxos para, de novo, loitar contra os prexuízos cara o galego botando man do humor gráfico.
Mantendo o lema Na Universidade en galego. Sen prexuízos, a ANL volve apostar polo formato dun calendario de parede no que cada páxina é un mes de 2018 e, en cada unha delas, o ilustrador gráfico Kiko Da Silva introduce unha viñeta na que a través do humor e a retranca presenta diferentes situacións cargadas de prexuízos sobre a lingua e se achegan recursos e estima para superalos.
Na tira de xaneiro, Da Silva lembra a figura de Son Goku, protagonista da mítica serie Bóla de Dragón, que marcou a infancia dos nenos galegos na década dos 90 a través do Xabarín Club.
