A natureza ofrece todo o tempo imaxes abraiantes. E o ser humano ten a capacidade de captalas, grazas á técnica, e compartilas co resto da sociedade. Así o fixo o fotógrafo canadense Steve Biro mentres tomaba imaxes nunha reserva para a conservación de aves rapaces no seu país. E atopouse con ese momento exacto: unha aguia calva (Haliaeetus leucocephalus) voaba ao raso da auga.
Ver esta publicación en Instagram
O efecto que acadou Biro é tan fermoso como asombroso. A figura da aguia, simétrica, reflíctese na superficie da auga de forma case perfecta, e tócaa coa punta das ás. O fotógrafo tomou centos de imaxes, pero viu que esta tiña algo máis. “Foi a que me pareceu un pouco máis especial cás outras”, declarou á BBC.
Aínda que foi, e é, un dos símbolos dos Estados Unidos, a aguia calva, que habita en Norteamérica, estivo a piques de desaparecer na segunda metade do século XX. Afortunadamente, os traballos de protección e conservación deron froitos, e a súa poboación está agora nun ritmo bo de recuperación.
