Algo pasa no satélite Europa do planeta Xúpiter. O anuncio da propia NASA dun descubrimento ‘sorprendente‘ ten espertado máxima expectación. Pero as certezas non chegarán ata a rolda de prensa que a axencia espacial ten programada para este luns para as 2 p.m, hora do Leste dos Estados Unidos, que serán as 8 da tarde en España.
A NASA convocou a todos os medios a unha rolda de prensa na que se “presentarán novos descubrimentos realizados a partir de imaxes de Europa, a lúa xeada de Xúpiter, capturadas polo telescopio espacial Hubble”.
O único que adiantou a axencia espacial é que os astrónomos presentarán uns resultados que amosan “sorprendente evidencia de actividade que podería estar relacionada coa presenza dun océano baixo a superficie de Europa”, explicou a NASA nun comunicado. Á rolda de prensa acudirán astrofísicos relacionados co Hubble e o estudo dos ambientes dos planetas.
A lúa Europa é a gran candidata a acoller vida fóra da Terra no Sistema Solar
Europa é o mellor candidato para atopar vida fóra da Terra no Sistema Solar. Este satélite saltou á fama cando se empezou a sospeitar que baixo da súa superficie conxelada hai un océano de auga líquida e salgada. E, o que é máis importante, moitos científicos cren que no seu interior podería haber condicións axeitadas para o desenvolvemento da vida con abundancia de carbono, nitróxeno, fósforo e xofre.
As dúbidas chegan porque non é seguro que Europa teña actividade hidrotermal que garanta o alimento e a calor que precisarían os microorganismos. E tampouco hai certezas sobre que poida pasar a luz ata o interior deste presunto océano.
O que si semella certo é que no satélite Europa hai máis auga líquida que en todos os océanos da Terra xuntos. E a auga é clave para a existencia de vida. Así que todas as especulacións están presentes ata que a NASA desvele o seu descubrimento este luns. Á espera das novas, a única certeza é que a axencia espacial ten conseguido o seu obxectivo de espertar interese mundial ante o seu misterioso achado.
