Explicación: este campo estelar abarca case 10 graos atravesando o ceo cara as constelacións setentrionais de Cassiopeia e Perseus. Á esquerda, a nube cósmica con forma de corazón, IC 1805 e IC 1848, coñécense popularmente coma as nebulosas Corazón e Alma. Doadas de albiscar á dereita están os cúmulos estelares NGC 869 e NGC 884 que tamén se coñecen coma h e Chi Perseii ou simplemente Cúmulo Dobre. Corazón e Alma, cos seus propios cúmulos incrustados de estrelas novas de millóns de anos de idade aproximadamente, teén cada unha uns 200 anos luz de diámetro e están a 6 e 7 anos luz de distancia. De feito, forman parte dun gran complexo activo de formación estelar espallado ao longo do brazo espiral de Perseo da nosa galaxia Vía Láctea. O Cúmulo Dobre está situado aproximadamente á mesma distancia que as nebulosas Corazón e Alma. Afastados só por uns poucos de anos luz, h e Chi Perseii están fisicamente achegados un ao outro, e estímase que ámbolos dous cúmulos teñen uns 13 millóns de anos de idade. A súa proximidade e idade similar suxiren que os dous cúmulos probablemente son o produto da mesma rexión de formación estelar.
