A NASA ven de lanzar dende Cabo Canaval (EUA) a nave Orion, un prototipo destinado a transportar ata catro astronautas máis alá da órbita terrestre. Nesta primeira viaxe de proba, de catro horas e media, non levaba persoas, pero o obxectivo é facelo en futuras misións de exploración espacial, incluíndo a visita a un asteroide e eventualmente a Marte. “É un paso crítico na viaxe a Marte”, destaca a axencia espacial estadounidense, que planea enviar humanos a ao planeta vermello na década de 2030 e, antes, a un asteroide sobre 2025 para recoller mostras. O voo de proba de Orión de hoxe axudará a desenvolver a tecnoloxía necesaria para estes grandes retos. Trátase da primeira misión dende a serie Apolo que leva unha nave espacial construída para enviar persoas ao espazo profundo, e tamén a primeira vez que se proban as naves espaciais de nova xeración da NASA.
