Cinco meses despois do seu lanzamento, a tripulación da misión Crew-11 da NASA viuse obrigada a iniciar o seu regreso á Terra o mércores 14 de xaneiro debido a un problema médico que afectou a un dos seus integrantes. Trátase da primeira evacuación preventiva dunha tripulación dende a Estación Espacial Internacional (ISS) á Terra na historia. A amaraxe, realiza fronte á Costa de San Diego ás 9:41 horas (hora española) a bordo da cápsula Crew Dragon Endeavour, puxo fin a unha viaxe de regreso que durou arredor de dez horas. Todo o proceso foi retransmitido pola NASA a través da rede social X, Amazon Prime e a canle oficial de YouTube da axencia.
A bordo da nave viaxaban Michael Fincke e Zena Cardman, astronautas da NASA, o ruso Oleg Platonov, e o xaponés Kimiya Yui. Porén, a axencia espacial estadounidense non revelou nin a identidade nin os detalles do astronauta afectado, aínda que confirman que o tripulante se atopa estable e que a decisión de adiantar o regreso se tomou por precaución, segundo explicou o administrador da NASA, Jared Isaacman.
O descenso comezou tras o peche da escotilla ás 22:00 horas, nunha operación que tamén foi retransmitida en directo. Tanto a amaraxe como a posterior recuperación da cápsula desenvolvéronse con total normalidade, nun océano en calma e cun equipo de rescate que mesmo facía bromas coa posibilidade de que golfiños se achegasen á nave. Este instante é o que se recolle no GIF. Uns 30 minutos máis tarde, a cápsula foi situada na plataforma de rescate para o seu traslado a porto.
O regreso da tripulación estaba inicialmente previsto para despois da chegada da misión Crew-12, cuxo lanzamento se agardaba para mediados de febreiro, aínda que nas actuais circunstancias podería adiantarse.
Podes ver a amaraxe de Crew-11 na seguinte ligazón.
