Impresión artística de HR 8799e. (ESO / L. Calçada)

Captan imaxes directas sen precedentes dun exoplaneta

O Gran Telescopio Austral Europeo logra fotografar este mundo, no que descubren unha colosal tormenta na súa atmosfera

Temperaturas abrasadoras de 880 graos centígrados. Nubes de ferro e po que envolven a todo o planeta nunha tormenta global. Tales son as condicións en HR 8799e, un exoplaneta a 129 anos luz de distancia, que se converte no primeiro en ser estudado directamente usando unha técnica chamada interferometría óptica. É grazas á aplicación desta técnica que temos unha análise tan detallada do planeta.

Observar exoplanetas directamente é unha fazaña moi grande. Dos 3.926 mundos confirmados ata a data, só uns poucos foron fotografados. Iso é así porque están moi lonxe e son demasiado opacos para ser vistos xunto á luz da súa estrela.

O Very Large Telescope (VLT) do Observatorio Europeo Austral en Chile é un dos telescopios que tomou tales imaxes directas, pero son demasiado borrosas para proporcionar detalles precisos. Agora, os datos de interferometría óptica do instrumento GRAVITY no VLT proporcionaron 10 veces a resolución de observacións anteriores, o que permite unha análise moito máis detallada do espectro do planeta, e que revela a súa composición química.

A técnica utiliza múltiples instrumentos para superpoñer sinais (xeralmente ondas electromagnéticas, como luz óptica ou infravermella, ou ondas de radio), que amplifican a resolución.

GRAVITY combina as capacidades dos catro telescopios unitarios de oito metros do VLT para funcionar como un telescopio xigante. O resultado é o equivalente a un só telescopio óptico cun espello de ao redor de 100 metros de diámetro.

Con esta amplificación impresionante, os astrónomos lograron observacións sen precedentes de HR 8799e. O exoplaneta é o mundo máis interior nun sistema de catro planetas que orbita a nova estrela HR 8799 . Foi descuberto en 2010 a través de imaxes directas utilizando o Observatorio WM Keck. Baseado en observacións anteriores, HR 8799e é bastante grande, entre cinco e 10 veces a masa de Xúpiter.

Este mundo orbita á súa estrela a unha distancia de aproximadamente 14,5 unidades astronómicas (UA). En comparación co Sistema Solar, estaría a medio camiño entre as órbitas de Saturno e Urano. Tamén sabemos que é un planeta moi novo, duns 30 millóns de anos (comparado cos venerables 4.500 millóns de anos da Terra).

O novo mundo é moi novo: ten 30 millóns de anos fronte aos 4.500 millóns da Terra

Mediante o uso da espectroscopia, que identifica as firmas de luz dos elementos químicos, o equipo determinou que o planeta está cuberto de nubes que conteñen ferro e silicatos (os minerais que forman as rochas). Debido a isto, HR 8799e está a ser sobrecalentado por un efecto invernadoiro.

Pero había unha sorpresa na atmosfera do planeta. “A nosa análise amosou que a HR 8799e ten unha atmosfera que contén moito máis monóxido de carbono que metano, algo que non se espera da química de equilibrio”, dixo o astrónomo Sylvestre Lacour do Observatorio de París e o Instituto Max Planck para Física Extraterrestre.

“Podemos explicar mellor este resultado sorprendente cos fortes ventos verticais na atmosfera que evitan que o monóxido de carbono reaccione co hidróxeno para formar metano”, analizou o investigador.

A combinación dunha atmosfera de monóxido de carbono e nubes de ferro e silicato produce unha turbulencia colosal, unha tormenta esmagadora que rodea todo o planeta.

A investigación foi publicada en Astronomy & Astrophysics

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.