As claves da brétema na costa de Galicia: calor, auga fría e pouco vento

Vista das néboas na costa atlántica ibérica durante o domingo, captadas polo satélite Terra da NASA.
Vista das néboas na costa atlántica ibérica durante o domingo, captadas polo satélite Terra da NASA.

Non é unha situación estraña no litoral galego, pero si que acadou maior repercusión este domingo ao alterar os plans de ocio de numerosas persoas que se achegaron á costa para gozar do verán: unha mesta brétema cubriu principalmente as Rías Baixas, mais tamén unha parte importante do norte de Galicia e o Cantábrico, así como toda a costa de Portugal ata Lisboa. A magnitude do episodio foi captada polo satélite Terra da NASA, como se pode ver na imaxe superior. E conduciu a un importante contraste entre os moitos lugares da costa nos que non se superaron os 20ºC de máxima, mentres que en varios puntos da provincia de Ourense se pasou dos 35ºC.

A brétema sorprendeu despois dun sábado de altas temperaturas, aínda que desde os servizos de meteoroloxía xa se estaba advertindo que o domingo podería amencer cun manto gris na costa. “As predicións xa advertían de que podería aparecer a brétema”, explica desde MeteoGalicia Alberto Romero. Porque o escenario era moi acaído:

“É moi habitual no verán, e nisto coinciden varios factores: o contraste entre a temperatura da auga e o calor do interior, sobre todo nas Rías Baixas, é notable. Fórmase entón a condensación da auga en forma de brétema. E a isto hai que engadir que nestes días o vento soprou pouco. Se houbese refachos máis fortes, de compoñente leste ou nordés, sería máis difícil que se formase a brétema”, engade Romero.

A néboa espállase deste xeito pola costa atlántica, aínda que as interaccións entre as diversas correntes costeiras provocan que outras partes da península queden alleas a ela. Así, como destaca Romero, ao sur de Lisboa e ata o estreito de Xibraltar, onde a temperatura da auga é máis alta, non se produce o contraste térmico e, por tanto, non se xeran as néboas.

Despois dos episodios de brétema de domingo e luns, é probable que o martes e o mércores tamén comecen con esta panorama gris no litoral. A partir do xoves, coa entrada de aire frío nas capas altas da atmosfera, a situación volverase inestable e, por tanto, a brétema costeira tenderá a irse disipando. Iso si, polo menos a medio prazo, non parece que apareza o Sol no seu lugar. Á espera de que os modelos afinen a súa precisión en canto se achegue a fin de semana, hai unha alta probabilidade de chuvias a partir do venres e ata o domingo que vén.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.