A explosión da central nuclear de Chernóbil en 1986 provocou a expulsión de material radioactivo e tóxico nun radio de varios miles de quilómetros cadrados. O accidente forzou á poboación supervivente a fuxir das áreas afectadas para nunca volver. Con todo, case 30 anos despois, un estudo publicado en Current Biology, demostra que a fauna salvaxe atopada nas inmediacións é moito maior agora que antes do accidente. “Isto non quere dicir que a radiación sexa boa para os animais, senón que as consecuencias da ocupación humana, a caza, a agricultura e a silvicultura poden ser moito peores”, apunta Jim Smith, da Universidade de Portsmouth (Reino Unido) e un dos autores do traballo. Segundo destacan os autores, a abundancia de alces, corzos, cervos, xabarís e lobos nestas zonas é comparable a catro reservas naturais da rexión que non están contaminadas. Un dos datos máis significativos é que o número de lobos que habita preto de Chernóbil é sete veces maior que o destas reservas naturais.
A fauna salvaxe toma Chernóbil
