Esta fin de semana, unha triste escena encollía o corazón de quen pasase pola ría de Vigo. Unha nai delfín nadaba xunto a súa cría morta, empuxábaa co seu morro, como se intentase revivila. Estes cetáceos viven a morte dos seus seres queridos dunha maneira sentida, con xestos tan conmovedores como este. O seu dó é moi intenso e pode prolongarse días e incluso semanas, segundo explican dende a Coordinadora para o Estudo dos Mamíferos Mariños (Cemma). Desta maneira, a nai estará co seu fillo incluso ata que este se descompoña, decida abandonalo e continuar ela soa.
De feito, dende a ONG intentaron retirar do mar o pequeno arroaz, mais ela non lles deixou e decidiron non insistir. Finalmente, a cría apareceu este domingo na enseada de Cangas sobre as 11 horas da mañá, e foi retirada posteriormente polo Servizo de Salvamento Marítimo. Segundo explican dende a Cemma, todos os anos prodúcense este tipo de episodios porque é fácil que os cachorros morran durante o primeiro ano de vida. Son moi vulnerables, como lle pasou a esta criatura.
“O difícil é dar con esta escena no momento no que a nai está nadando con el. O normal é que aparezan os bebés varados e case descompostos, e é por esa razón, porque quedan coa nai durante moito tempo”, comentan dende a Cemma. A nai é perfectamente consciente de que o seu fillo está morto e chega un momento no que o abandona. Para estes animais, o momento da reprodución é moi importante, empregan moito esforzo, por iso estes sucesos son tan duros para eles.
