As primeiras semanas de 2019 foron bastante secas, co anticiclón protexendo Galicia da entrada das borrascas propias desta época do ano. Pouca auga e moito frío, polo que se chegaron a acadar os -10ºC en varias zonas do interior. Porén, esta fin de semana chegan as primeiras precipitacións importantes do ano, e virán da man dun río atmosférico que cruzará o Atlántico cargado de aire húmido e sumará chuvia á borrasca que xa se achega.
Un río atmosférico, segundo explicaba en novembro Ana Lage, de MeteoGalicia, é unha “masa de aire moi húmido, con grandes cantidades de auga precipitable nas capas altas da atmosfera, que pode chegar a ter milleiros de quilómetros de longo e poucos centos de quilómetros de ancho, que cruza o Atlántico desde as latitudes tropicais ata a costa europea”.
Este fenómeno, estudado en profundidade desde hai anos por expertos galegos de MeteoGalicia e a USC, ten unha grande importancia para a climatoloxía debido á gran achega de humidade que trae consigo. Así, os traballos realizados neste senso tiveron un importante impacto internacional.
Así MeteoGalicia subliña que durante este sábado a fronte será máis activa e, unida á humidade que chega desde o Océano, deixará intensas precipitacións. Xa está activado, de feito, o aviso amarelo na zona do interior de Pontevedra e o Baixo Miño, con niveis que poderían superar os 40 litros por metro cadrado en 12 horas entre as 6 da madrugada do sábado e as 18 horas.
Se tes que sair mañá sábado non esquezas o paraugas ☔️. A fronte será máis activa que a de hoxe 🌧️. Teremos a borrasca máis preto e chega un río atmosférico que aporta moita humidade. Sen embargo non deixará apenas neve porque o vento do suroeste traerá temperatura máis suave 🌡️. pic.twitter.com/O9OxOsy12Z
— MeteoGalicia (@MeteoGalicia) 18 de enero de 2019
Porén, non chegará moita neve o sábado xa que o vento soprando do suroeste suavizará as temperaturas. Pero cambiarán a dirección norte a partir da tarde, e os termómetros baixarán. Poderá chegar entón a neve á montaña de Lugo. Activouse tamén o nivel amarelo desde a medianoite do domingo ata a do luns, xa que se poderían acumular máis de cinco centímetros de neve.