Únete á nosa canle de Whatsapp
Despois do paso da borrasca Jorge, que provocou refachos con ventos de ata 153,8 km/h en Carballeda de Valdeorras e importantes precipitacións, sobre todo na parte oeste de Galicia, un novo temporal, bautizado como Karine, provoca unha nova situación de inestabilidade en Galicia desde a tarde-noite do domingo, e que se prolongará ata o marte.
Karine forma parte dunha sucesións de sistemas frontais atlánticos, asociados a novos centros de presión, que estenderán as precipitacións e os ventos fortes a gran parte da Península e a Baleares. Despois do breve paso de León, borrasca bautizada por MétéoFrance, a fronte Karine, máis activa, fará que se intensifiquen as precipitacións no cuadrante noroeste da península. Desde as 21 horas, e ata a medianoite do luns ao marte, a Axencia Galega de Emerxencias activou a alerta laranxa na costa por ondas de ata seis metros en todo o litoral de Galicia, e o nivel é laranxa en toda Galicia, agás no norte da provincia da Coruña e Lugo, por refachos superiores aos 100 km/h.
Respecto ás chuvias, Karine mantén activado o aviso de nivel amarelo por posibles acumulacións de máis de 50 litros por metro cadrado nas provincias de Pontevedra e Ourense. Xa na tarde do domingo, tanto a rede da Aemet como a de MeteoGalicia rexistraron importantes chuvias.
Precipitación acumulada hasta las 20:00 de 35,2mm. en prov. de Pontevedra.Datos PROVISIONALES de est. auto. pic.twitter.com/kwcJ7EiEnV
— AEMET (@AEMET_Esp) March 1, 2020
Karine trae de volta a neve
Xa chegado marzo, con Karine regresa a neve, xa que a cota baixará ata os 600 metros ao longo do luns, debido á baixada de temperaturas. A previsión obrigou a activar a alerta amarela na montaña de Lugo e Ourense durante todo o luns, xa que se poderán acumular máis de cinco centímetros.
As precipitacións poderán caer tamén de forma intensa e localizada no tempo, con avisos amarelos no sur do país por acumulacións de ata 15 litros por metro cadrado en só unha hora.
A inestabilidade durará ata o martes, cando se manterán refachos de vento superiores aos 100 quilómetros por hora no litoral e zonas altas.
