É probable que a presente acometida do SARS-CoV-2 en Galicia e España sexa a última dun virus que leva golpeando á sociedade desde marzo de 2020, en sucesivas ondas, coas conseguintes restricións e ‘desescaladas’. En pleno verán, e con xa preto do 60% da poboación galega coa pauta completa da vacina, o coronavirus volveu pola única fenda que quedaba sen protexer: a poboación menor de 40 anos, aínda sen vacinar, e con máis interaccións sociais, está a rexistrar cifras de contaxios sen precedentes. Estímase que nos últimos 14 días, 1 de cada 50 mozos e mozas galegos de entre 12 e 29 anos tivo un diagnóstico positivo pola infección do coronavirus. O 80% dos novos casos son de persoas menores de 40 anos.
Esta incidencia concéntrase, por tanto, en persoas cun risco moito menor de desenvolver unha forma grave de Covid-19 que provoque a hospitalización. Ademais, cada vez son maiores as evidencias de que se está a producir un importante nivel de transmisión fóra do foco de rastrexo, por mor da escasa asistencia aos cribados poboacionais ou o incumprimento das corentenas, entre outros aspectos.
Porén, as estimacións do comité clínico, que amosou este mércores o presidente da Xunta de Galicia, elevaron a preocupación. De manterse nas vindeiras semanas as cifras destes últimos días, con máis de 1.000 diagnósticos diarios, o nivel de ingresos e ocupación en coidados intensivos podería achegarse aos niveis da primeira e terceira ondas da pandemia. Isto é: a proporción de casos graves sería moito menor grazas ás vacinas e á protección da poboación máis vulnerable, pero unha incidencia desbocada levaría a que, igualmente, a carga asistencial sexa elevada. Isto xa se está observando na actualidade, segundo os datos de Sanidade: das 21 persoas ingresadas na UCI, oito teñen menos de 40 anos.
Así, o avance da campaña de vacinación non sería suficiente diante do alto número de contaxios. A Xunta prevé iniciar a semana que vén a vacinación do grupo de 20 a 29 anos e completar a pauta no grupo de 40-49 anos. Nestes días, do mesmo xeito, completarase a primeira inxección o grupo 30-39. Mais o presidente da Xunta advertiu que, coa transmisión actual, xa se están a producir casos de contaxios no ámbito familiar "de netos a avós" que, a pesar da alta efectividade da vacina, conducen a ingresos hospitalarios.
Limitación de reunións
Diante desta desfavorable evolución, o comité clínico e o departamento de Sanidade da Xunta pon o acento nos encontros sociais para conter esta nova vaga da Covid-19. Son limitacións, tal e como recordou Alberto Núñez Feijoo, que afectan a dereitos fundamentais e, por tanto, obrigan a ter o visto bo do Tribunal Superior de Xustiza de Galicia. Nestes ámbitos, segundo a información recollida polos servizos epidemiolóxicos, é onde se están a concentrar boa parte dos novos surtos.
Desta volta, o novo modelo de restricións sitúa a preto de 40 concellos en nivel alto ou máximo por mor da súa elevada incidencia. Pero, ao contrario que en ocasións anteriores, non se abordarán peches perimetrais ou da hostalaría.
A Xunta volve restrinxir os encontros sociais diante do crecemento da nova vaga da pandemia
Así, en todo o territorio galego quedarán prohibidas (se o TSXG o autoriza) as reunións de máis de seis persoas en interiores e 10 en exteriores. Alén disto, poderanse xuntar persoas que pertenzan a un máximo de dous grupos de convivencia e superen estas cifras; isto é: dúas familias conviventes que superen, en conxunto, os 10 membros, poderanse reunir tanto en interiores como exteriores.
Ademais, durante a noite prohibiranse, se o TSXG o admite, as reunións de non conviventes. A limitación estará vixente entre a 1 e as 6 da madrugada nos 36 concellos en nivel máximo ou alto e entre as 3 e as 6 no nivel medio e medio-baixo, onde quedan os restantes 277 concellos. “Queremos evitar as reunións multitudinarias sen garantías que están detrás dun gran número de contaxios”, resumiu este mércores o presidente da Xunta.
Hostalaría
A outra das novidades afecta ao acceso ao interior dos locais de hostalaría dos concellos en nivel alto ou máximo. Para conter o risco de transmisión neste ámbito, a Xunta establecerá a obriga de presentar un certificado de vacinación completa, unha proba negativa nas últimas 72 horas ou ter pasado a infección por SARS-CoV-2 para poder entrar nos locais. Non será esixible isto nas terrazas, e os nenos e nenas menores de 12 anos estarán exentas destas medidas.
Neste mapa e nesta táboa podes consultar o resumo das principais medidas, que entrarán en vigor na medianoite do venres 23 ao sábado 24 de xullo. Os detalles están pendentes da súa publicación no Diario Oficial de Galicia.
Hai un erro nesta frase: “Ademais, durante a noite prohibiranse, se o TSXG o admite, as reunións de conviventes.” Ou van ter que ir todos (menos un) durmir a un hotel? 😉