Galicia vivirá esta fin de semana unha situación extrema en canto a condicións meteorolóxicas, sobre todo no referente aos refachos de vento. Despois da activación do aviso vermello no litoral polas ondas de 10 metros, a Axencia Estatal de Meteoroloxía ofrece un empeoramento das previsións ante a chegada da cicloxénese explosiva Fabien. Entre as 15 horas do sábado e as 12 da mañá do domingo, advírtese de risco extremo ante refachos de máis de 140 quilómetros por hora nas rexións costeiras desde Bergantiños ata Ribadeo (o aviso vermello no mar esténdese tamén por toda a costa cantábrica).
20/12 11:45 #AEMET actualiza #FMA en Galicia. Activos hoy y mañana. Nivel máx rojo. Imagen del mapa de avisos en vigor a las 11:45 . Para ver una tabla de avisos actualizada haga CLIC EN LA IMAGEN o visite https://t.co/L2maiFjIpg https://t.co/zGXvSD5S4b
— AEMET (@AEMET_Esp) December 20, 2019
A situación será tamén moi complicada no resto de Galicia, xa que está activado o nivel laranxa en todo o territorio por refachos que poderían superar os 100 quilómetros por hora. E a chuvia será intensa no interior da provincia de Pontevedra, con previsións de máis de 40 l/m2 en 12 horas. O impacto de Fabien notarase en todo o noroeste peninsular, con chuvias xeralizadas e fortes que poderían empeorar a situación dos ríos en varios puntos de Galicia onde se sufriron inundacións nos últimos días. É o caso do río Miño en Ourense, onde a Confederación Hidrográfica Miño-Sil informou de que se acadou o nivel de alerta, podendo dar lugar a desbordamentos puntuais. En zonas como a do encoro de Velle, moi preto da cidade, as imaxes amosan o volume do caudal que leva o río. No Sil tamén se acadou o nivel de alerta no Barco de Valdeorras. Tamén en Ourense, o río Bibei, afluente do Sil, deixou illada a aldea de Pradorramisquedo, en Viana do Bolo.
Así va ahora mismo el Miño a su paso por Ourense, con el embalse de Velle desaguando a tope. pic.twitter.com/vHGAZ33Nor
— Xosé Carballo (@XCarballo) December 19, 2019
Esta situación, que deixa un panorama complicado á espera de Fabien, deixou xa máis de 1.800 incidencias en toda Galicia, segundo informa o 112. Un home faleceu en Santiago de Compostela debido ao derrubamento dun muro na zona de Bonaval debido ás fortes precipitacións. Na beira do río Tambre producíronse inundacións na zona de Ponte Maceira, onde houbo que evacuar varias vivendas, e en Portomouro (Val do Dubra) o alumnado rematou as clases antes de tempo para evitar que a suba da auga lle impedise abandonar o centro. Ademais, mantéñense elevados os niveis dos ríos Ouro, Landro (Lugo), Eume, Ulla (A Coruña), Lérez e Verdugo (Pontevedra) seguen con caudais elevados.
Así baixa o #Tambre ao seu paso pola Ponte Maceira. pic.twitter.com/lblpP5oS1t
— Javier C. Vázquez (@JaviPeto) December 19, 2019
Agárdase que os efectos de Fabien remitan a partir das últimas horas do domingo e dea paso, cara ao Nadal, de varios días de estabilidade atmosférica.
