Únete á nosa canle de Whatsapp
Moitos puntos de Galicia xa están experimentando problemas de inundacións e outras incidencias pola combinación das fortes precipitacións, o estado do mar e os refachos de vento, que superan os 150 quilómetros por hora por momentos. Pero a sucesión de temporais, por agora, non se detén, despois do paso de Daniel e Elsa en apenas tres días. A Axencia Estatal de Meteoroloxía avanzou para este sábado un aviso de nivel vermello por ondas que poderían superar os 10 metros na costa galega. Será debido a unha cicloxénese explosiva, xa que se trata dunha borrasca que se profundizará rapidamente ao baixar a súa presión máis de 20 milibares en 24 horas.
🔴Este sábado será un día moi complicado no mar. Como vemos no modelo de ondas, súmanse, a axitación do mar pola chegada dunha profunda borrasca no Atlántico, e os ventos moi fortes do sudoeste.⚠️🌊🌊🌊⚠️ #sentidiñohttps://t.co/795Ol1Dc28 pic.twitter.com/ba15Q66No7
— MeteoGalicia (@MeteoGalicia) December 19, 2019
O nivel vermello quedará activado desde as 18 horas ata, alomenos, a medianoite do sábado ao domingo, entre a ría de Arousa e estaca de Bares, e será laranxa no resto da costa galega. Ademais, en toda Galicia o nivel será laranxa por ventos de máis de 100 quilómetros por hora xa desde a madrugada do venres ao sábado. Por outra banda, choverá intensamente, e de forma especial no interior da provincia de Pontevedra, onde se agardan máis de 40 litros por metro cadrado en menos de 12 horas e estará activado o aviso amarelo.
Ventos de máis de 160 km/h
Así, é posible que se cheguen a superar os fortísimos refachos de vento rexistrados estas pasadas horas, cun máximo de 160,5 km/h nas Neves, 152 en Oia, 142 en Viveiro, 135 en Bueu e Vimianzo e 134 en Cervantes. En canto ás chuvias, o mércores caeron 99 litros por metro cadrado en Santa Comba e 98 en Val do Dubra.
As constantes precipitacións e o vento están provocando serios problemas en moitos puntos do país, unha situación que levou á Xunta a elevar o nivel de alerta a emerxencia en situación 1 debido ás inundacións. Desde a Axencia Galega de Emerxencias, a partir da información de augas de Galicia, advirten de aumentos de caudal nas bacías dos ríos Landro, Miño, Ouro (Lugo), Mero, Xallas, Tambre, Eume (A Coruña), Miño, Umia e Verdugo (Pontevedra) e Arnoia, Caldo e Miño (Ourense). Do mesmo xeito, os altos niveis aos que chegaron os embalses poderían levar á apertura de comportas nalgúns casos, que incrementarían tamén o nivel de ríos. É o caso do río Xares, no leste de Ourense, segundo se informou desde a empresa xestora da presa de Prada, en Ponferrada.
En total, a Axencia Galega de Emerxencias rexistrou máis de 1.000 incidencias en apenas 36 horas.
