Únete á nosa canle de Whatsapp
Un buraco negro é unha “rexión do espazo da que non pode saír ningunha radiación a causa da intensa forza de atracción producida pola contracción da masa dunha estrela”. Así os define o Dicionario da Real Academia Galega. Tamén se poden chamar ‘buratos negros’.
Pero a física especula tamén con outros furados no universo, como os buracos de verme, tamén coñecidos como pontes de Einstein-Rosen. Trátase dunha hipotética característica topolóxica do espazo-tempo, descrita polas ecuacións da relatividade xeral, a cal é esencialmente un “atallo” a través do espazo e o tempo. Un buraco de verme ten polo menos dous extremos, e algúns estudos especulan con que permitirían viaxar a grandes distancias, mesmo entre galaxias. Pero, polo de agora, só imos ver os buracos de verme en filmes de ciencia ficción como ‘Interestellar’. A realidade comprobada, mesmo recentemente fotografada, son os buracos negros, dos que falamos nun novo capítulo do noso Dicionario da Ciencia.
‘Dicionario da Ciencia’ é unha serie de audiovisuais producidos por GCiencia, e presentados pola actriz Déborah Vukusic, que afondan dun xeito desenfadado nas palabras relacionadas coas ciencias.
