Central do Tambre, a catedral da electricidade

O espectacular edificio deseñado nos anos 20 do século XX polo arquitecto Antonio Palacios está situado nun enclave cunha abraiante paisaxe

Nos anos vinte do pasado século, ergueuse na beira do río Tambre un monumento industrial único. É unha central hidroeléctrica que ten aires de pazo ou de catedral, nun portentoso edificio deseñado en 1924 polo arquitecto Antonio Palacios, autor de obras como o Círculo de Belas Artes ou o Pazo das Comunicacións de Madrid, o Teatro García Barbón de Vigo, a casa do concello do seu Porriño natal ou o Templo Votivo do Mar en Panxón (Nigrán).

A central hidroeléctrica fornécese do encoro de Barrié de la Maza sobre o río Tambre e foi promovida pola Sociedad Gallega de Electricidad. De feito, está considerado o primeiro aproveitamento industrial de Galicia destinado a grandes consumos. O resultado, fronte as grandes que teñen producido un inmenso impacto ambiental en ríos como o Miño ou o Sil, é unha integración na paisaxe dun xeito moi afastado da posterior tradición dos saltos hidroeléctricos construidos durante o chamado ‘desarrollismo’. Por desgraza, se o río Tambre foi en tempos rico en lampreas e salmóns, a construción do encoro rematou con esta fauna fluvial.

Actualmente, xunto á central eléctrica hai un pequeno hotel con encanto. E existen diferentes roteiros, que inclúen unha ponte colgante e o paso por diferentes ruinas de vellos muíños e instalacións eléctricas. Por desgraza, a masiva presenza de plantacións de eucalipto afea un espazo natural que, noutros tramos, presenta unha vexetación máis atractiva.

Seguindo o río Tambre cara á súa desembocadura na ría de Muros e Noia, atoparemos a espectacular Ponte Nafonso, cos seus ben trazados tallamares e que ten a súa orixe na Idade Media.

Como anécdota, a etimoloxía do Tambre vén da raí celta indoeuropea ‘Tam’, que tamén atopamos noutros ríos como o Támega, en Galicia, ou o Támese, o río que baña a cidade de Londres. E unha segunda curiosidade é que o río Tambre dá nome ao condado de Trastámara (Trans Tameris). E os Trastámara foron unha casa real tan importante como que a ela pertenceu a raíña Isabel A Católica e a súa filla Xoana, ata que con Carlos I comezou a dinastía dos Austrias.

2 COMENTÁRIOS

  1. Boas. Un artigo moi interesante, pero gustariame rebatir a parte na que se cita que dende que se construiu o encoro non hai lampreas. É máis a propia construcción do encoro data do ano 1958, ano no cal xa se apreciaba un declive importante na retorna dende o mar desta especie ás augas do Tambre antes de que estivese constuido, debido a que o caudal do río foi minguando cos anos considerablemete. Tamén dicir que dende fai anos os caudais dos rios están regulados por lei (caudais ecolóxicos), e concretamente a competencia nesta zona recae en Augas de Galicia. Cabe destacar que aplican a vixilancia desta lei de maneira estricta, e grazas a cal, a día de hoxe, estase a repoboar o río da tan famosa lamprea. Todos estes datos son corroborables, e invito a calquera a que fale coa xente veterana da aldea que hai preto da central, o “Castro Lampreeiro”, que como se pode apreciar ten tradición na captura destes exemplares, e pode apoiar estes datos que aporto. Un saúdo.

  2. Unha mágoa a desfeita ecolóxica da ribeira do Tambre neste tramo do río, non só hai eucaliptos, principalmente está invadida de acacia negra (hai uns grandes exemplares no parque da central) e mimosa. Debería facerse algo ao respecto.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.