As investigadoras do Centro de Investigación en TIC (Citic) da Universidade da Coruña (UDC) Amparo Alonso e Bertha Guijarro forman parte do equipo fundador da recentemente creada Sociedade Española de Intelixencia Artificial en Biomedicina (IABiomed). Trátase dunha entidade que ten como obxectivo fomentar a investigación e o desenvolvemento da intelixencia artificial aplicada a biomedicina, unha área onde esta tecnoloxía está a ter gran transcendencia.
Precisamente, a nova entidade xorde ao abeiro da Rede Temática sobre Intelixencia Artificial en Biomedicina creada en 2018, da que o grupo de investigación LIDIA da UDC, dirixido por Amparo Alonso e representado na rede por Bertha Guijarro, tamén formaba parte, e que foi o xerme desta colaboración científica a nivel estatal.
“A intelixencia artificial ten aplicacións cada vez máis amplas en biomedicina, incluíndo a investigación médica, o diagnóstico de enfermidades, a medicina personalizada e a atención ao paciente. Por iso, parécenos moi relevante a creación desta sociedade, que é unha ferramenta de enorme potencial xa que fomenta a colaboración entre profesionais de diferentes áreas”, sinalaron as investigadoras do CITIC e cofundadoras da entidade.
Retos de futuro
A entidade está integrada por 42 investigadores de 16 provincias españolas e busca a promoción da colaboración na actividade científica así como a investigación multidisciplinar na área de intelixencia artificial en Biomedicina. Así mesmo, tamén quere promover actuacións que permitan xerar recursos de interese para a divulgación, a investigación e a formación neste ámbito. De feito, un dos obxectivos de IABiomed é establecer vínculos e sinerxías con empresas e organismos públicos e privados que se poidan beneficiar de maneira directa e indirecta das actividades e aplicacións da IA no eido da Biomedicina.
Así mesmo, a Sociedade é consciente dos desafíos presentes e futuros aos que debe facer fronte no campo da biomedicina, polo tanto, os esforzos de IABiomed irán principalmente destinados a atopar solucións para eses retos, tales como o acceso aos datos de saúde con fins de investigación, a falla de tratamentos para enfermidades raras, os problemas derivados da resistencia aos antibióticos, novas pandemias ou a mellora dos procesos clínicos.
