Xinzo de Limia, no top 3 dos lugares máis fríos da Península

A chaira da Limia, e a súa vila de Xinzo, está sendo estes días un dos lugares máis xélidos da península Ibérica. Habería que subir ata os picos do Mulhacén ou o Aneto para sentir máis frío do que senten estes días os habitantes desta comarca ourensá. Despois de pasar días con temperaturas máis baixas ca Estocolmo, Oslo ou Reykjavik, a estación da Axencia Estatal de Meteoroloxía (Aemet) en Xinzo rexistrou nos últimos tres días mínimas por debaixo dos -10ºC.

Mínimas do sábado 5 de xaneiro, con Xinzo en terceiro lugar. Fonte: Aemet.
Mínimas do sábado 5 de xaneiro, con Xinzo en terceiro lugar. Fonte: Aemet.

Uns valores que a situaron, tanto este día 7 como o 5, véspera de Reis, no podio das estacións máis frías da rede da Aemet. A localidade segoviana de Cuéllar, que chegou aos –12.1ºC este domingo, encabeza a clasificación. O resto de estacións situadas entre as máis xélidas da península sitúanse en zonas da Meseta, nalgúns casos atravesadas por ríos como o Douro e o Ebro (Sardón de Duero, Cubillo de Ebro ou Aranda de Duero, entre outros), polo que se acrecenta, coa influencia dos cursos de auga, o fenómeno da inversión térmica que experimenta estes días a Península. Así, en Portugal, a temperatura máis baixa (-7ºC) rexistrouse en Miranda do Douro.  No caso da chaira da Limia, a humidade do que queda da lagoa da Antela e o aire frío que descende desde os cumios próximos do Invernadoiro e o Macizo Central acrecentan o impacto deste fenómeno.

Publicidade

Porén, no ‘top 10’ destas temperaturas habería que incluír tamén a Calvos de Randín (Ourense) onde a estación da rede de MeteoGalicia rexistrou o día 6 -9,8ºC e este luns, -9,3ºC. Esta vila, nun val preto da serra do Xurés e co encoro de Salas moi preto, as temperaturas baixaron moito máis ca noutros lugares. Segundo MeteoGalicia, Xinzo ‘só’ caeu ata os -8,4ºC na mañanciña do domingo. A explicación é que a estación da rede autonómica ubicada en Xinzo está xunto ao aeródromo de Antela, mentres que a da Aemet sitúase na entrada da vila pola N-525, de aí as pequenas diferenzas térmicas. De feito, segundo MeteoGalicia, tanto Lanzós (Vilalba) con -9,3ºC na mañá do domingo, como Verín, con -9,1ºC, rexistraron máis frío cá vila limiá.

 

1 comentario

  1. Para ser o “máis frio”, ou un dos máis fríos, tería que selo coa temperatura media (aquela que sae de dividir entre 2 a suma das máximas e das mínimas de todo o ano), non simplemente coas mínimas puntuais debidas á xeada provocada pola inversión térmica. (Para selo nestes días, habería que proceder igual cos datos destes días).

DEIXAR UNHA RESPOSTA

Please enter your comment!
Please enter your name here

Este sitio usa Akismet para reducir o spam. Aprende como se procesan os datos dos teus comentarios.

Relacionadas

Un río atmosférico regará Galicia a fin de semana e o aire polar baixará drasticamente as temperaturas

Meteogalicia acende a alerta laranxa no mar para xoves e venres por ondas que poden superar os cinco metros

Galicia participa nun estudo internacional que sinala o músculo esquelético como clave na adaptación ao frío

O traballo vincula a falta de α-actinina-3 á resistencia fronte ás baixas temperaturas, vinculado a unha variante xenética que portan 1.500 millóns de persoas

Unha autopista de humidade acende en Galicia alertas laranxas e amarelas por chuvia e vento

A sucesión de borrascas atlánticas deixará máis de 50 l/m2 en menos de 12 horas no oeste da comunidade e refachos de ata 100 km/h

A borrasca subtropical Charles regará Galicia con fortes chuvias durante o mércores

A nova zona de baixas presións tomará o relevo de Bruna e MeteoGalicia establece a alerta amarela en Ourense por precipitacións