Únete á nosa canle de Whatsapp
Non caeu en Galicia, nin en Europa, nin en ningunha zona habitada. A estación espacial chinesa Tiangong-1 fixo esta madrugada a súa reentrada na atmosfera arredor das 2.15 da hora central europea. Tal e como confirmou a Axencia Espacial Europea e outros organismos, como a Forza Aérea dos Estados Unidos, a nave volveu á Terra no Pacífico Sur, ao noroeste de Tahití, e moi lonxe de calquera zona de risco para a poboación. Segundo as informacións que achegaron as autoridades chinesas, a maior parte dos compoñentes da nave desintegráronse durante a entrada na atmosfera.
US air force confirms #Tiangong1 reentry this morning at ~02:16 CEST over the Pacific – not too far from the uninhabited area that is typically used for controlled reentries. This time well within ESA’s final forecast windows https://t.co/OzZLoYnlc4
— ESA Operations (@esaoperations) 2 de abril de 2018
Curiosamente, tal e como sinalou a ESA no seu anuncio, a zona da reentrada da Tiangong-1 está preto dunha área que é habitualmente utilizada polas axencias espaciais para facer as caídas controladas dalgúns equipos espaciais. Alí foron dirixidas, entre outras, a estación rusa MIR ou o vehículo automatizado Jules Verne.
O último paso da Tiangong-1 sobre Galicia
Aínda que Galicia estaba situada nunha das zonas con máis posibilidades de ser a área de entrada da nave chinesa, as probabilidades de impacto seguían sendo baixísimas. Tal e como destacaba a propia ESA, as probabilidades de ser golpeado por un fragmento da Tiangong-1 (que medía algo máis de 10 metros e pesaba 8 toneladas) eran 10 millóns de veces menores que as de ser alcanzado por un raio.
Con todo, nunha das súas últimas órbitas, a Tiangong-1 pasou xusto sobre Galicia. Foi o pasado venres, tal e como se pode ver baixo estas liñas. A estación espacial sobrevoou o centro do país de oeste a leste.
En la última pasada de Tiangong-1 por España, hemos librado. #Tiangong1
🚀😱 pic.twitter.com/ZsgqNnkIm4— Juan Pe Fraga (@jupefc67) 31 de marzo de 2018
A Tiangong-1 fora lanzada en 2011 e prestou servizo ata decembro de 2015, manténdose a unha altura de entre 330 e 390 quilómetros, ata que China lanzou a súa ‘sucesora’, a Tiangong-2. Nun principio, a axencia espacial do país planeaba unha caída controlada da antiga estación sobre a Terra, orientando aos posibles restos cara o cemiterio espacial do Pacífico Sur, pero en marzo de 2016 perderon o control sobre ela.
