O xoven Pedro Vieites Pérez, do IES Plurilingüe Rosalía de Castro de Santiago de Compostela, obtivo en Loja (Ecuador), unha das medallas de bronce da XII Olimpiada Iberoamericana de Bioloxía, na que participou representando a España. Vieites competiu xunto a tres compañeiros no certame, que se desenvolveu entre os días 9 e 15 deste mes nesta cidade ecuatoriana.
Xunto a Vieites, Iker Puerto (Andalucía) e Laura Hidalgo (Castilla y León) conseguiron senllas medallas de ouro, e Eduardo Martínez (Madrid) recibiu tamén unha medalla de bronce.
España quedou en segundo lugar, con dous ouros e dous bronces, por detrás de Costa Rica
Foi, en palabras da delegación española, un “rotundo éxito” no certame, no que España qeudou en segundo lugar detrás de Costa Rica, o que supón o mellor resultado das 12 edicións celebradas ata agoa na Olimpiada Iberoamericana.
Nesta ocasión, como contou GCiencia hai unhas semanas, a delegación estatal viuse obrigada a abrir unha campaña de financiamento para sufragar os gastos da viaxe, ante a falta de apoio institucional. Porén, pouco despois de esta acción, segundo indicou Antonio Jimeno, membro da xunta directiva da Olimpiada Española de Bioloxía (OEB), a entidade recibiu o apoio económico de diferentes entidades, como as consellerías de Educación de Galicia, Andalucía e Madrid, varios colexios autonómicos de Biólogos e outras entidades.
Nunha situación semellante estivo a delegación española da Olimpiada Internacional de Matemáticas, na que o galego Santiago Vázquez obtivo tamén unha medalla de bronce, que tivo que recorrer á axuda privada para poder viaxar ao certame.
