Participantes de máis de 30 países asistirán ao Galicia Innovation Days

Bélxica, Italia, Francia e Grecia son, xunto con España, os que maior presenza terán neste evento, que se celebrará entre o 25 e o 29 de outubro

O Galicia Innovation Days celebraranse entre o 25 e o 29 de outubro. Foto: Feuga
O Galicia Innovation Days celebraranse entre o 25 e o 29 de outubro. Foto: Feuga

Trinta países de catro continentes. Esas son as cifras de participantes do Galicia Innovation Days, un evento organizado pola Fundación Empresa Universidade Galega (Feuga) e a Xunta de Galicia que dará a coñecer as novas oportunidades de financiamento que se abren coas convocatorias do programa Horizonte Europa. Así é que a estas xornadas, que se celebrarán entre o 25 e o 29 de outubro, asistirán investigadores e representantes de universidades, empresas e centros tecnolóxicas de distintas partes do mundo.

Os países que maior presenza terán no evento serán, amais de España, os de Bélxica, Italia, Francia e Grecia. Mais o interese por coñecer estas novas formas de financiamento vai máis alá das fronteiras europeas e chegará a países como Singapur, India, Ghana, Turquía, Perú, México, Venezuela, Chile ou Guadalupe, entre outros. Ademais, o Galicia Innovation Days celebrarase en liña e será gratuíto.

Medio ambiente, dixitalización e alimentación

A estas xornadas asistirán expertos internacionais que abordarán o programa “Horizonte Europa” para falar dos retos aos que se terá que enfrontar a sociedade no futuro e o papel que xogan a innovación e a investigación. As áreas que suscitan máis interese son as de medio ambiente, dixitalización e alimentación, seguidas doutras temáticas como as da industria, a enerxía e o clima.

Aínda que dende o evento están a esperar as últimas confirmacións de asistencia, queren salientar a participación de tres relatores. O primeiro é o Policy Officer para a Transición Ecolóxica e Social da Comisión Europea, Gerd Schönwälder. Tamén estará a directora xeral de Investigación e Innovación – Transformacións Industriais da Comisión Europea, Garbiñe Guiu Etxeberria, e a Policy Officer e directora xeral de Agricultura e Desenvolvemento Rural da Comisión Europea, Inge Van Oost.

Aberto o prazo para reunións individuais

Outro dos sinais de identidade do Galicia Innovation Days son as reunións individuais, que facilitan que os participantes poidan establecer novos contactos. Para que se xere esa rede de colaboración poderán intercambiar mensaxes e celebrar encontros a través da plataforma b2match. O prazo para inscribirse estará aberto ata o 29 de outubro. Dende Feuga tamén explican que os asistentes poderán incluír información sobre o seu perfil e intereses, así como solicitar ditas reunións.

Este evento, que dará a coñecer as capacidades de Galicia en investigación e innovación, tamén informará sobre as convocatorias de Horizonte Europa; un programa de financiamento europeo de I+D+i que conta cun orzamento de 95.000 millóns de euros para o período 2021-2027. Dende Feuga indican que contan cunha área de programas europeos, que se engloba dunha das liñas estratéxicas da fundación, como é impulsar a investigación e tamén a innovación.


Para máis información e rexistro, prema nesta ligazón.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.